گەرمانيادا ازامات ادامنىڭ يممۋن تاپشىلىعى ۆيرۋسىنان تولىق ەمدەلىپ شىقتى

Nature جۋرنالىندا جاريالانعان ماقالاعا سايكەس، 2008 -جىلى ا ي ت ۆ دياگنوزى قويىلىپ، «ديۋسسەلدورف پاتسيەنتى» دەپ اتالىپ كەتكەن ەر ادامعا 2013 -جىلى قانداعى قاتەرلى ىسىك - وتكىر ميەلويدتى لەيكوزدى ەمدەۋ ءۇشىن ترانسپلانتاتسيا جاسالدى.

«ديۋسسەلدورف ۋنيۆەرسيتەتىنىڭ اۋرۋحاناسى ءتورت جىلدىق جۇيەلى باقىلاۋدان كەيىن الەمدە ا ي ت ۆ-نى ەمدەۋدىڭ العاشقى دالەلىن كەلتىرە الادى»، - دەلىنگەن زەرتتەۋشىلەردىڭ دۇيسەنبىدە جاريالانعان مالىمدەمەسىندە.

ا ي ت ۆ-دان ەمدەۋدى باستاعاننان كەيىن التى اي وتكەن سوڭ «ديۋسسەلدورف پاتسيەنتىنە» جەدەل ميەلويدتى لەيكوز (ج م ل) دياگنوزى قويىلدى. ءبىراق كوڭىل كونشىتپەيتىن بولجامعا قاراماستان، دارىگەرلەر ەكى اۋرۋدى ءبىر ەمدەۋمەن جەڭىپ شىعۋ مۇمكىندىگىن كوردى.

ول ءۇشىن دارىگەرلەر قاۋىپتى اۋرۋ تۇرلەرىن ءدىڭ جاسۋشالارىن ترانسپلانتاتسيالاۋ ارقىلى ەمدەۋگە شەشىم قابىلداعان، دەلىنگەن ماقالادا.

2006 -جىلى «بەرليندىك پاتسيەنت» دەگەن اتپەن بەلگىلى تيموتي رەي براۋن وسى ەمنەن كەيىن ا ي ت ۆ-دان ايىققان الەمدەگى العاشقى ادام بولدى. براۋن 2020 -جىلى 54 جاسىندا لەيكوزدىڭ قايتالانۋىنان كەيىن قايتىس بولدى، ءبىراق ا ي ت ۆ-دان ەمدەۋ ونىڭ ءومىرىنىڭ سوڭىنا دەيىن ءتيىمدى بولدى.

ادام كاستيلەحو ەسىمدى «لوندوندىق پاتسيەنت» 2017 -جىلى تەراپيانى توقتاتىپ، ا ي ت ۆ-دان ايىققان ەكىنشى ادام بولدى.

ترانسپلانتاتسيادان كەيىن التى جىل وتكەن سوڭ «ديۋسسەلدورف پاتسيەنتى» ا ي ت ۆ-عا قارسى پرەپاراتتاردى قابىلداۋدى توقتاتتى. سودان كەيىن زەرتتەۋشىلەر پاتسيەنتتىڭ قانىندا بەلسەندى ۆيرۋس بەلگىلەرى قالماعانىنا كوز جەتكىزۋ ءۇشىن اۋقىمدى سىناقتار جۇرگىزدى.

بۇل زەرتتەۋلەر ا ي ت ۆ ەمدەۋ ادىستەرىن دامىتۋدا جاقسى جەتىستىكتەردى كورسەتكەنىمەن، بۇل ەمدەۋ ستراتەگياسى حالىقتىڭ كوپشىلىگى ءۇشىن قولايلى ەمەس. بۇل - ەمدەلمەيتىن جانە ومىرگە قاۋىپ توندىرەتىن جاعدايلار ءۇشىن عانا قاراستىرىلاتىن وتە ءينۆازيۆتى، جوعارى تاۋەكەلدى پروتسەدۋرا، دەپ اتاپ وتىلگەن زەرتتەۋدە. سونداي- اق، كوپ جاعدايدا وعان دونور تابۋ قيىن.

قازىرگى ۋاقىتتا عىلىمنىڭ ماقساتى - الىنعان بىلىمگە نەگىزدەلگەن تاۋەكەلى از پروتسەدۋرالاردى ازىرلەۋ، ا ي ت ۆ-عا قارسى ءدارىنى ادامدار ءۇشىن قولجەتىمدى ەتۋ، دەپ قوسىپ ءوتتى ماقالا اۆتورلارى.

اۆتور

زارينا تۋعانبايەۆا