اقتوبەلىك ونەرتاپقىش اككۋمۋلياتوردان قۋات الاتىن قارماق ويلاپ تاپتى - فوتو

اقتوبە. قازاقپارات - اقتوبە وبلىسى ىرعىز اۋدانىنىڭ تۇرعىنى جاعىپار قادىروۆ اككۋمۋلياتوردان قۋات الاتىن قارماق ويلاپ تاپتى. ءوزى بالىق اۋلاپ تا ءجۇر، دەپ حابارلايدى قازاقپارات ءتىلشىسى.

اقتىرعىز اۋدانىنىڭ تۋماسى جاعىپار قادىروۆ بۇعان دەيىن شاعىن تراكتور قۇراستىرىپ شىعارعان. قازىر كولىك ءوز قاجەتتىلىگىنە جاراپ تۇر. ءشوپ شابادى، تاسيدى، قار دا ارشۋعا بولادى. ال تاياۋدا اككۋمۋلياتوردان قۋات الاتىن قارماق ويلاپ تاپتى. جاڭا قۇرىلعىنى جاساپ شىعۋ ءۇشىن 10 كۇن عانا جەتكىلىكتى بولعان.

«قارماققا كوپ نارسەنىڭ قاجەتى جوق. بىرەۋىنە كولىكتىڭ تەرەزەسىنە سۋ شاشاتىن ديمانو قولدانىلدى. ەكىنشىسى ۆاكۋمنەن دايىندالدى. ول كولىكتىڭ ەسىگىندە بولادى. ەسىك جابىلعاندا قۇلىپتالىپ قالسا، مۇندا وعان رەلە ورناتتىم. ەكەۋى دە بالىقتى جاقسى اۋلايدى. ءوزىمىز قولدانىپ تا كوردىك»، - دەدى ونەرتاپقىش جاعىپار قادىروۆ.

ىرعىز اۋدانىنىڭ تۋماسى بۇرىن نان زاۋىتىندا مەحانيك، ەلەكتريك بولدى. ارنايى وقۋ ورنىندا ءبىلىم الماسا دا جاستايىنان تەحنيكاعا اۋەس جاعىپار قادىروۆ موتوسيكلگە قوزعالتقىش ورناتقان. كەيىن پوليتسيا قىزمەتكەرلەرى ەسكەرتۋ بەرىپ، قىلمىستىق جازاعا تارتىلاتىنىن ايتقان. ايىپپۇل تولەپ قۇتىلعان سوڭ وزگە دۇنيەلەردى ويلاپ تاپتى. ولاردىڭ اراسىندا ەت تارتقىش قۇرىلعىسى دا بار.

«حالىقارالىق ايەلدەر كۇنىنە ارناپ ەت تارتقىش جاساپ جاتىرمىن. ايەلىمە سىيلايمىن. بۇعان دەيىن اۋدانداعى كاسىپكەر تاپسىرىس بەرىپ، جاسادىم. دىبىسى جوق، اياق استىنان جانىپ تا كەتپەيدى. قۋاتتىلىعى كۇشتى. ءوزىم جاساپ شىعارعان ۇساق-تۇيەك دۇنيە كوپ. ەندى قىستا جۇرەتىن كولىك جاساعىم كەلەدى. قازىرگى كەزدە قاجەتتى قۇرال-جابدىقتى جيناپ جاتىرمىن. وزىمدە كولىككە تەحنيكالىق قىزمەت كورسەتۋ ورتالىعى بار. جوندەيمىز، كولىكتى بوياپ بەرەمىز. جوندەۋ جۇرگىزۋى ءۇشىن اۋداننان عانا ەمەس، قالادان دا كەلەدى. ءارى ىرعىز سامارا- شىمكەنت تاسجولىندا ورنالاسقان. وسى جۇمىستار كەزىندە جاڭا دۇنيەلەرگە ۋاقىت تابۋ قيىن. دەگەنمەن تەمىر جونۋ قولدان كەلگەن سوڭ قۇرىلعى جاساۋ، ويلاپ تابۋ قيىن ەمەس»، - دەدى ول.

جاعىپار قادىروۆ ءتورت بالانىڭ اكەسى. ءۇش ۇل، ءبىر قىزى بار. بۇل سالانىڭ ءوزى ادام تالعايتىنىن جاسىرمايدى.

«تەحنيكانىڭ ءتىلىن كەز كەلگەن ادام ۇعا بەرمەيدى. مەكتەپ بالالارى دا كەلىپ، جۇمىسىممەن تانىسىپ كەتەدى. ىنتاسى بارى از، سيرەك كەزدەسەدى. ۇيرەنەم دەپ كەلەتىندەر كەيدە ءبىر ايدان سوڭ كەتىپ قالادى. جانىمدا جۇرگەن بالالارىمنىڭ ءوز ماشيناسى بار. ال ءوزىمنىڭ كولىگىمە بيىل 45 جىل تولدى. قاڭقاسى لۋاز، ىشكى قۇرال-جابدىعى وزگەرگەن. كوبى قولدان جاسالدى، كوپ بۇزىلمايدى. بۇرىن اڭ اۋلاۋعا شىققاندا ايدادىم. قازىر دە شارۋاشىلىققا جاراپ تۇر»، - دەدى جاعىپار قادىروۆ.

اۆتور

التىناي ساعىندىقوۆا