اكىمشىلىك سوت پروتسەسىنە كىمدەر كۇشتەپ اكەلىنبەيدى - زاڭ جوباسى
بۇل تۋرالى ادىلەت مينيسترلىگى اشىق تالقىعا شىعارعان زاڭ جوباسىندا جازىلعان، دەپ حابارلايدى قازاقپارات ءتىلشىسى.
«اشىق» ن ق ا پورتالىندا جاريالانعان قۇجاتتا اكىمشىلىك قۇقىق بۇزۋشىلىق تۋرالى كودەكستىڭ 790-بابىنا (كۇشتەپ اكەلۋ) وزگەرىس ەنگىزۋ ۇسىنىلعان.
«شاقىرتۋ بويىنشا دالەلدى سەبەپتەرسىز كەلمەگەن كەزدە وزىنە قاتىستى اكىمشىلىك ءىس جۇرگىزىلىپ جاتقان جەكە تۇلعا نە زاڭدى تۇلعانىڭ وكىلى، اكىمشىلىك جاۋاپتىلىققا تارتىلاتىن كامەلەتكە تولماعان ادامنىڭ زاڭدى وكىلى كۇشتەپ اكەلىنۋى مۇمكىن. كۇشتەپ اكەلۋدىڭ جالپى مەرزىمى 1 ايدان اسپاۋعا ءتيىس»، - دەپ كورسەتىلگەن جاڭا رەداكسيادا.
شاقىرتۋ تۋرالى حابارلامانى العان تۇلعانىڭ ىسكە قاتىسا الماۋىنا دالەل بولاتىن سەبەپتەر:
- ادامنىڭ ءوز بەتىنشە ءجۇرىپ كەلۋ مۇمكىندىگى بولمايتىن اۋرۋىنىڭ بولۋى؛
- جاقىن تۋىستارىنىڭ قايتىس بولۋى؛
- دۇلەي ءزىلزالا، ادامدى بەلگىلەنگەن مەرزىمدە كەلۋ مۇمكىندىگىنەن ايىراتىن وزگە دە سەبەپتەر؛
«وزىنە قاتىستى اكىمشىلىك ءىس جۇرگىزىلىپ جاتقان جەكە تۇلعا شاقىرۋ بويىنشا بەلگىلەنگەن مەرزىمدە كەلۋگە كەدەرگى كەلتىرەتىن دالەلدى سەبەپتەردى شاقىرعان ورگانعا حابارلاۋعا مىندەتتى. بۇعان قوسا، كۇشتەپ اكەلۋ تۇنگى ۋاقىتتا جۇرگىزىلمەيدى»، - دەلىنگەن قۇجاتتا.
كۇشتەپ اكەلۋ شەشىمى ءىستى قارايتىن سۋديانىڭ، ورگاننىڭ ۇيعارىمى نەگىزىندە قابىلدانادى. جەكە تۇلعانى سوت پروتسەسىنە اكەلۋ ىسىمەن ىشكى ىستەر جانە سىبايلاس جەمقورلىققا قارسى ءىس-قيمىل جونىندەگى ۋاكىلەتتى ورگان، سونداي-اق ەكونوميكالىق تەرگەۋ قىزمەتى جۇرگىزەدى.
«جۇكتى ايەلدەر، 14 جاسقا تولماعان بالانى جالعىز تاربيەلەپ وتىرعان ايەلدەر مەن ەرلەر، سونداي-اق دەنساۋلىق جاعدايىنا بايلانىستى ءوزىنىڭ بولاتىن جەرىنەن كەتە المايتىن نەمەسە كەتپەۋگە ءتيىس ناۋقاستار كۇشتەپ اكەلۋگە جاتپايدى»، - دەپ جازىلعان جاڭا رەداكسيادا.
سونىمەن قوسا، ۋاكىلەتتى ورگاندار 16 جانە 18 جاسقا تولماعان ادامداردى ولاردىڭ زاڭدى وكىلدەرىنە ەسكەرتپەستەن كۇشتەپ اكەتە المايدى.
ايتا كەتەيىك، قازىرگى زاڭاناما تالاپتارىندا جوعارىدا اتالعان ەرەجەلەر جوق.
قۇجات 13- ناۋرىزعا دەيىن كوپشىلىك تالقىلاۋدا بولادى.
