كوروناۆيرۋستىڭ وميكرون ءتۇرى قازاقستاندا ءالى دە بار - مينيسترلىك

استانا. قازاقپارات – ق ر دەنساۋلىق ساقتاۋ مينيسترلىگى سانيتاريالىق-ەپيدەميولوگيالىق باقىلاۋ كوميتەتى جۇقپالى اۋرۋلاردى ەپيدەميولوگيالىق قاداعالاۋ باسقارماسىنىڭ باسشىسى روزا قوجاپوۆا ەلدەگى ەپيدەميولوگيالىق جاعدايدى باياندادى، دەپ حابارلايدى قازاقپارات ءتىلشىسى.

سپيكەردىڭ ايتۋىنشا، بۇگىنگى كۇنى رەسپۋبليكادا ك ۆ ي+ 1 ميلليون 400 مىڭنان استام ناۋقاس جانە ك ۆ ي- 90 مىڭنان استام جاعداي تىركەلگەن.

«رەسپۋبليكا جانە بارلىق وڭىرلەر جاسىل ايماقتا تۇر. تاۋلىگىنە 120 عا دەيىن ك ۆ ي+ جانە 20 عا دەيىن ك ۆ ي- جاعدايى تىركەلۋدە، ناۋقاستاردىڭ %99 ساۋىعىپ شىقتى. قازاقستاندا سوڭعى 2 اپتادا الدىڭعى 2 اپتامەن سالىستىرعاندا سىرقاتتانۋشىلىق 1,4 ەسەگە - ياعني 754 تەن 1075 جاعدايعا دەيىن ءوستى»، - دەدى ر. قوجاپوۆا ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

سونىمەن بىرگە كۆي بار پاتسيەنتتەرگە ستاتسيونارلىق كومەك كورسەتۋ ءۇشىن 2056 توسەك-ورىن اشىلعان، ونىڭ ىشىندە ينفەكتسيالىق توسەك- ورىن – 1747، قامتىلعانى - 104 (%6)، بوس تۇرعانى - 1643 (%94).

رەانيماتسيالىق توسەك-ورىن – 309، قامتىلعانى - 8 (%3)، بوس تۇرعانى - 301 (%97).

«شتامداردى سايكەستەندىرۋ ناتيجەسى رەسپۋبليكادا وميكرون نۇسقاسىنىڭ اينالىمدا جۇرگەنىن كورسەتتى»، - دەدى روزا قوجاپوۆا.

ايتا كەتەيىك، 20- اقپانداعى ستاتيستيكا بويىنشا 70 ادامنان كوروناۆيرۋس ينفەكسياسى تابىلعان ەدى.