قازاقستان تۋرالى رومانداردىڭ كونكۋرسىنا ەندى شەت ەلدەگى قانداستارىمىز دا قاتىسا الادى

استانا. قازاقپارات - قازىرگى قازاقستان تۋرالى ۇزدىك رومان ءۇشىن جىل سايىن بەرىلەتىن MECENAT. KZ ادەبي سىيلىعىنىڭ ەكىنشى كەزەڭى باستالدى.

وسى ۋاقىتتان باستاپ قازاق تىلىندەگى قولجازبالار كەز كەلگەن ەل ازاماتتارىنان، ورىس تىلىندەگى قولجازبالار تەك قازاقستان ازاماتتارىنان قابىلدانادى. بارلىق تالاپتار www.mecenat.kz سايتىندا.

جۇمىستار 2023 -جىلدىڭ 15-مامىرىنا دەيىن www.mecenat.kz سايتىندا قابىلدانادى.

جوبانىڭ ءبىرىنشى كەزەڭى ءساتتى وتكەنى بارشاڭىزعا ءمالىم. «كۇلپەت» اتتى قازاق تىلىندە جازىلعان رومان جەڭىمپاز اتاندى. بۇل رومان كونكۋرستىڭ www.mecenat.kz سايتىندا وتكەن حالىقتىق داۋىس بەرۋ ناتيجەسىندە جەڭدى. ماراپات كولەمى اي سايىن ءومىر بويى تولەنەتىن 500 دوللار. اتالمىش سىيلىق الەمدىك دەڭگەيدەگى ايتا قالارلىقتاي اقپاراتتىق جاعداي بولدى.

ءوزىنىڭ تىرناقالدى «كۇلپەت» رومانىمەن جەڭىمپاز اتانعان قازىعۇل شارحان ناعىمەت ۇلى ءۇشىن 2022 -جىلدىڭ 4-شىلدەسىندە الماتىدا «Freedom Support USA» باعدارلاماسى بويىنشا جەدەل ەرىكتى اننۋيتەتتىك ساقتانداندىرۋ شارتى شىعارىلدى.

قازىرگى تاڭدا جەڭىمپازدىڭ تۋىندىسى ورىس تىلىنە اۋدارىلۋدا، سونداي- اق بۇل رومان 5 مىڭ دانا تارالىممەن «Arna-B» باسپاسىنان كىتاپ بولىپ شىعارىلادى.

سونىمەن قاتار جۇلدەنىڭ قوسىمشا دەمەۋشىلەرى تابىلدى، ولار اقتىق سىنعا قاتىسۋشىلاردىڭ كىتاپتارىن 1 مىڭ دانادان باسىپ شىعارۋعا دايىن.

ءبىرىنشى جىلدىڭ ستاتيستيكاسى:

تىركەلگەن اۆتور سانى: 137

سايتقا كىرگەن ادام سانى: 62 مىڭ

داۋىس بەرگەندەر: 6756

جۇكتەلگەن رومان: 67

حالىقتىق داۋىس بەرۋگە وتكەن رومان سانى: 21

جۇلدە ماقساتى - قازاقستاندىق كوركەم ادەبيەتتى جانە ونى وقۋعا دەگەن ىنتانى دامىتۋ، ەل جازۋشىلارىنىڭ دەڭگەيىن كوتەرۋ جانە الەمدىك كىتاپ نارىعىنا شىعارۋ.

جوباعا مەتسەناتتىق كومەك كورسەتۋشى تانىمال قازاقستاندىق كاسىپكەر تيمۋر تۋرلوۆ پىكىرى: «قازاقستاندىقتاردىڭ شىعارماشىلىق الەۋەتى وتە جوعارى».

ادەبي سىيلىقتىڭ نەگىزىن قالاۋشى ەرلان اسقاربەكوۆ قازاقستاندىقتاردى كونكۋرس جۇمىسىنا قاتىسۋعا شاقىرادى: «ءبىز بارلىق وتانداستارىمىزدان mecenat.kz سىلتەمەسىن كەرەمەت رومان جازا الادى دەگەن دوستارىنا جانە تۋىستارىنا جىبەرۋدى وتىنەمىز».

سىيلىق قاعيداتتارى:

مەملەكەتتىك بيۋدجەتتەن تولىق تاۋەلسىز. مەملەكەتتىك ورگانداردان تەك قانا اقپاراتتىق قولداۋ كۇتەمىز؛

مۇددەلەردىڭ اشىق جانە جاسىرىن كەلىسپەۋشىلىگىن تۋدىرۋعا سەبەپ بولاتىن قازىلار القاسىنان باس تارتۋ؛

اقتىق سىنعا قاتىسۋشىلار كينوپروديۋسەرلەرمەن جانە باسپالارمەن تۋرا ماراپاتتاۋ الاڭىندا كەزدەسەدى.

جۇلدە ۇيىمداستىرۋشىلارى بارشا دەپۋتاتتاردى، جۇلدىزداردى، بلوگگەرلەردى جانە زيالى قاۋىم وكىلدەرىن ادەبي كونكۋرسقا اقپاراتتىق قولداۋ كورسەتۋگە شاقىرادى.

باس اقپاراتتىق دەمەۋشى - «Qazaqstan TV» ۇلتتىق تەلەارناسى.

اقپاراتتىق دەمەۋشى - «نۇر- مەديا» حولدينگى.

جوبانىڭ سەرىكتەستەرى – ق ر اقپارات جانە قوعامدىق دامۋ مينيسترلىگى جانە ق ر مادەنيەت جانە سپورت مينيسترلىگى.

Mecenat.kz قازىرگى قازاقستان تۋرالى ۇزدىك رومان كونكۋرسىنىڭ جەڭىمپازى ءومىر بويى ايىنا 500 دوللاردان الىپ تۇرادى.