پسيحولوگتار بالانىڭ تالابىن شەكتەيتىن تىيىم سوزدەردىڭ ءتىزىمىن جاسادى
وزدەرىن «جاڭا قازاقستاننىڭ» جارشىسى رەتىندە تانىستىرىپ جۇرگەن «جاڭا ادامدار» قوزعالىسى پسيحولوگ ماماننىڭ كومەگىمەن قوعامداعى بالانىڭ دامۋىنا كەدەرگى كەلتىرەتىن تىيىم سوزدەردى انىقتاپ، نەيروجەلىنىڭ كومەگىمەن ول سوزدەردەن كەلەتىن زياندى شارتتى يلليۋستراتسيالار ارقىلى كەسكىندەپ شىققان.
«تيمە، سىندىراسىڭ!»، «ءبىرىنشى رۇقسات سۇراۋ كەرەك»، «اكەل، ءوزىم ىستەيىن»، «قۋماشى»، «تىنىش وتىر».. .
پسيحولوگ زارينا كەنجەقاردىڭ پايىمىنشا، وتتىڭ باسى، وشاقتىڭ قاسىندا ءجيى ايتىلاتىن وسى سوزدەر بالانىڭ ساناسى مەن مىنەز- قۇلقىندا وشپەس ءىز قالدىرىپ جاتىر.
بۇل سوزدەردى ەستىپ وسكەن بالا ۇلكەن ومىرگە اياق باسقاندا بىرەۋ كەلىپ يتەرمەلەمەسە، ءوز قالاۋىمەن ءىس باستامايتىن، ءار قادامىن اينالاسىنا الاڭداپ باساتىن، قولىنان كەلىپ تۇرعان ءىستىڭ ءوزىن سەنىمسىزدىكپەن ورىندايتىن ەرىكسىز ادام بولىپ ءوسۋى مۇمكىن.
ال يلليۋستراتسيالار «وسى سوزدەردى الەمگە ءبىلىمى مەن ەڭبەگىنىڭ ارقاسىندا تەڭدەسسىز جەتىستىككە جەتكەن ادامدار ەستىپ وسسە، نە بولار ەدى» دەگەن سۇراققا جاۋاپ ىزدەيدى.
قوعالىس بەلسەندىسى الپامىس ءابىلوۆ قوعامداعى كەلەڭسىز قۇبىلىستاردىڭ تامىرىن جويۋ ءۇشىن جۇرت بولىپ زياندى تىيىم سوزدەردەن ارىلۋ قاجەت دەپ ەسەپتەيدى.
«بىزگە ءارى قاراي دا باسقالاردىڭ پىكىرىنە جالتاقتاپ، ءار ارەكەتىمىزدەن ۇيالىپ ءومىر سۇرە بەرۋگە بولادى. بىرەۋدىڭ باستاماسى مەن تىڭ يدەياسىن بايىبىنا بارماي جاتىپ سىناۋ، ءوزىمىزدىڭ ىستەپ جۇرگەن شارۋامىزعا كۇمانمەن قاراۋ سياقتى جات ادەتتەردەن ارىلۋىمىز كەرەك. ول ءۇشىن ادامدى كەرى تارتىپ تارتىپ، تەجەيتىن تىيىم سوزدەردەن ارىلۋىمىز كەرەك. ال ول اركىمنىڭ تىلىنە يە بولۋىنان، ويلانىپ سويلەۋىنەن باستالادى. ويتكەنى، اركىم ءوزىن وزگەرتۋ ارقىلى اينالاسىن دا وزگەرتەدى. سوندا عانا «جاڭا قازاقستاندى» بىرگە قۇرا الامىز»، - دەيدى ول.
بۇعان دەيىن اتالمىش ۇيىمنىڭ كىمدەردىڭ قولداۋىمەن قۇرىلعانى تۋرالى مالىمەت ۇسىنعان ەدىك.
