ەكس-شەنەۋنىك باقىتگۇل حامەنوۆا جوعارعى سوتقا شاعىم تۇسىرەتىنىن ايتتى

اتىراۋ. قازاقپارات - اتىراۋ وبلىسى اكىمىنىڭ بۇرىنعى ورىنباسارى باقىتگۇل حامەنوۆا جوعارعى سوتقا شاعىم تۇسىرەتىنىن ءمالىم ەتتى، دەپ حابارلايدى قازاقپارات.

كەشە، 20- اقپاندا اتىراۋدا ب. حامەنوۆانىڭ ىسىنە قاتىستى اپەللياتسيالىق شاعىم قارالا باستاعانىن جازعان ەدىك.

اپپەلياتسيالىق شاعىم وبلىستىق سوتتىڭ قىلمىستىق ىستەر جونىندەگى سوت القاسىندا قارالدى. بۇگىن، 21- اقپاندا سوت القاسى 7 جىلعا سوتتالعان ەكس-شەنەۋنىككە ۇكىمدى وزگەرىسسىز قالدىردى.

ەندى ب. حامەنوۆا جوعارعى سوتقا شاعىم تۇسىرەتىنىن ايتىپ وتىر.

«ەندىگى ءۇمىت - جوعارعى سوتتا. مەنىڭ ەش كىنام جوق. سوندىقتان كاسساتسيالىق ساتىداعى جوعارعى سوت ءىستىڭ ەگجەي-تەگجەيىن قاراپ، ۇكىم شىعارادى دەپ ويلايمىن. ءوزىمنىڭ اقتىعىمدى دالەلدەۋ ءۇشىن سوڭىنا دەيىن كۇرەسەمىن. جوعارعى سوتقا جۇگىنىپ، ادىلدىككە جەتەمىز»، - دەپ ءمالىم ەتتى ول.

ەسكە سالايىق، اتىراۋ وبلىسى اكىمىنىڭ بۇرىنعى ورىنباسارى باقىتگۇل حامەنوۆانىڭ ىسىنە قاتىستى سوت وتىرىسى بىلتىرعى 11- تامىزدا باستالعان ەدى. ايىپتاۋ اكتىسى 55 بەتتەن تۇردى.

بىلتىرعى 15- قاراشادا ۇكىم شىعىپ، ول 7 جىلعا سوتتالدى. سوت وبلىس اكىمىنىڭ بۇرىنعى ورىنباسارىن ق ر قىلمىستىق كودەكسىنىڭ 366-بابى 3-بولىگىنىڭ 2-تارماعىمەن (ءىرى كولەمدە پارا الۋ) كىنالى دەپ تانىدى.

ونىڭ جاس بالالارىنىڭ بارى ەسكەرىلىپ، قىلمىستىق كودەكستىڭ 74-بابى 1-بولىگىنە سايكەس جازانى وتەۋ مەرزىمى 3 جىلعا كەيىنگە قالدىرىلدى.

كەيىن حامەنوۆا سوت ۇكىمىنە اپپەلياتسيالىق شاعىم ءتۇسىردى.