تاشكەنت تۇرعىندارىنا جاڭا تابىس كوزى پايدا بولۋى ىقتيمال

استانا. قازاقپارات- جوبا بويىنشا تۇرعىن ءۇي شاتىرلارىنا كۇن پانەلدەرى ورناتىلادى. بۇل كۇن ساۋلەسىنەن بالامالى قۋات الۋعا مۇمكىندىك بەرەدى. ال ارتىلعان ەلەكتر ەنەرگياسىن مەملەكەتكە ءۇش ەسە قىمبات تاريفپەن ساتۋ قاراستىرىلعان.

مۇنداي جوبانى ەلدىڭ ەكونوميكالىق زەرتتەۋلەر ينستيتۋتى ۇسىندى. عالىمدار وسىلايشا گاز تاپشىلىعىن ازايتامىز دەپ وتىر. كۇن پانەلدەرىن كوپتەپ ورناتاتىن كەز جەتتى. ەكونوميكالىق زەرتتەۋلەر ينستيتۋتى ەلدى ەنەرگەتيكالىق داعدارىستان الىپ شىعۋدىڭ ازىرگە جالعىز جولىن ۇسىنىپ وتىر. ساراپشىلاردىڭ ايتۋىنشا، ءبىر عانا تاشكەنتتە كەلەر جىلى ەلەكتر قۋاتى تاپشىلىعى ءۇش ەسە ارتۋى مۇمكىن. قىستىڭ كوزى قىراۋ مەن جازدىڭ اپتابىندا حالىق جىلۋ نە جارىقسىز وتىرماۋ ءۇشىن وزدىگىنەن قام جاساۋعا كىرىستى.

وزبەكستاندا تۇرعىندار قۋات كوزىن ءوز ۇيىندە ءوندىرىپ قانا قويماي، ونى مەملەكەتكە قايتا ساتا الادى. ياعني ەنەرگيا ارتىلسا، ءبىرىڭعاي جەلىگە جىبەرەدى. بۇل جاعدايدا تاريف ءۇش ەسە قىمباتتايدى. وزبەكستان پرەزيدەنتى ءۇي- جايىندا بالامالى ەنەرگەتيكانى دامىتىپ وتىرعان ازاماتتارعا قوسىمشا سۋبسيديا بەرۋ كەرەكتىگىن ايتقان. ءار كيلوۆاتىنا 1 مىڭ سومنان تولەنەدى. شاتىرعا ورناتىلاتىن كۇن پانەلدەرىن ءبولىپ تولەۋ شارتىمەن ساتىپ الۋ مۇمكىندىگى بار. ورتاشا ەسەپپەن قۇنى 50 ميلليون سوم، تەڭگەگە شاققاندا 2 ميلليونعا تەڭ.

ءابۋالي نيازماتوۆ، تاشكەنت قالالىق قوعامدىق كەڭەسىنىڭ مۇشەسى:

- تۇرعىندار وزدىگىنەن ەنەرگيا وندىرۋگە مۇمكىندىك الادى. بۇل جوبانى پرەزيدەنت جانىنداعى ەكونوميكالىق زەرتتەۋلەر ينستيتۋتى كوپتەن بەرى ۇسىنىپ جۇرگەن ەدى. ەندى ىسكە اسىراتىن كەز كەلدى. ەنەرگەتيكالىق داعدارىسقا دەيىن دە باستاۋعا بولار ەدى.

مەملەكەت كۇن پانەلدەرىنە ورناتۋ ءۇشىن قوسىمشا ىنتالاندىرۋ شارالارىن ەنگىزدى. بۇعان دەيىن ەلدە ءبىرقاتار مەملەكەتتىك نىسان، سونىڭ ىشىندە اكىمدىك عيماراتتارى بالامالى قۋات كوزىن قولدانا باستاعان. ال ناۋاي جانە بۇقارا سىندى وڭىرلەردە ءىرى كۇن ەلەكتر ستانسيالارى ىسكە قوسىلدى. مەملەكەت جاڭادان سالىناتىن تۇرعىن ۇيلەرگە وسىنداي كۇن پانەلدەرىن ورناتۋدى مىندەتتەپ وتىر. ال گازبەن جۇمىس ىستەيتىن كەي الەۋمەتتىك نىساندار كومىرگە كوشەدى. ناتيجەسىندە 1 ميلليارد تەكشە مەتر كوگىلدىر وتىن ۇنەمدەلەدى. ۇكىمەت ۇزىن سانى 5407 عيمارات، 1147 -جىلىجاي جانە 250 زاۋىتتى كومىرمەن قامتيتىن بولادى. ءونىم شەتەلدەن جەتكىزىلۋى مۇمكىن.

وبيدجون ديلمۋرودوۆ، وزبەكستان ەنەرگەتيكا مينيسترلىگىنىڭ باسپا ءسوز قىزمەتكەرى:

- حالىق پەن بيۋدجەتتىك ۇيىمداردى كومىرمەن قامتۋ ءۇشىن ايماقتارعا 3 مىڭ 400 توننا ءونىم جەتكىزىلدى. گازدان اجىراتىلعان جىلىجاي مەن زاۋىتتاردىڭ قاجەتتىلىگىن وتەۋ ەنەرگەتيكا مينيسترلىگىنىڭ قۇزەرىتىنە كىردى. 1- ساۋىردەن باستاپ وزبەكستان اۋماعىنا اكەلىنەتىن كومىردى تەمىرجول ارقىلى تاسىمالداۋ تاريفى 50 پروتسەنتكە تومەندەيدى.

وزبەكستان كومىردىڭ باسىم بولىگىن قازاقستاننان تاسىمالداۋى دا مۇمكىن. ەلدىڭ ەنەرگەتيكا مينيسترلىكتەرى اراسىندا ءتيىستى كەلىسىم بار. ازىرگە كورشىمىز گازعا دەگەن تاۋەلدىلىكتى بارىنشا تومەندەتۋگە كۇش سالىپ جاتىر. دەمەك ءبىرىنشى كەزەكتە بيزنەس ەنەرگيا قاجەتتىلىگىنىڭ 50 پروتسەنتتەن استامىن كۇن پانەلدەرى ارقىلى وتەيتىن بولادى.

اۆتورى: راۋان مىڭبايەۆ

www.24.kz