شەرتپە كۇي جايلى كىتاپ جارىق كوردى
«جەتىسۋدىڭ وڭتۇستىك- شىعىسىنداعى كۇيشىلىك ءداستۇر» اتتى عىلىمي مونوگرافيا كۇيشىلىك ونەردىڭ ايماقتىق سيپاتتارىن ايقىنداۋمەن، سونىمەن قاتار، جەتىسۋ كۇيلەرىنىڭ شىعۋ تەگى مەن وسى وڭىرگە عانا ءتان دومبىراشىلىق - كۇيشىلىك ونەر ەرەكشەلىكتەرىنىڭ تەوريالىق تانىم تۇجىرىمدارىنىڭ نەگىزدەلۋىمەن ماڭىزدى. بۇل كىتاپتا جاريالانىپ وتىرعان زەرتتەۋ ناتيجەلەرىن ادەبيەتتانۋ، ونەرتانۋ، تاريح، ەتنوگرافيا، ەستەتيكا، پەداگوگيكا جانە باسقا دا ارناۋلى سالالارىندا پايدالانۋعا، سونىمەن قاتار، ارناۋلى ورتا، جوعارى مۋزىكا وقۋ ورىندارىندا كومەكشى قۇرال رەتىندە قولدانۋعا بولادى. ال «كۇي شاقىرتقى» اتتى ەكى نۇسقاداعى كۇي جيناقتا بازارالى مۇپتەكەيەۆتىڭ ورىنداعان كۇيلەرى جيناقتالعان.
بازارالى مۇپتەكەيەۆ - ورىنداۋشىلىق ونەردە ارتىنا جارقىن ءىز قالدىرعان كۇيشى ءارى كورەگەن زەرتتەۋشى. ول - جەتىسۋ كۇيشىلىك مەكتەبىن قايتا جاڭعىرتقان تۇڭعىش فولكلورتانۋشى، وسى تاقىرىپ اياسىندا ديسسەرتاتسيا قورعاعان ءھام حرەستوماتيالىق كۇي جيناقتارىن جازعان عالىم. سانالى عۇمىرىندا جەتىسۋمەن قاتار ارقا، قاراتاۋ، التاي، ىلە، بايولكە ايماقتارىنىڭ كۇيشىلىك مۇراسىن جيناقتاۋمەن اينالىستى، ولاردى جۇيەلەدى، كاسىبي مەكتەپ ءتۇزىپ عىلىمي اينالىمعا ەنۋىنە تەر توكتى.
جيناقتىڭ تۇساۋىن ق ر مەملەكەتتىك سىيلىعىنىڭ لاۋرەاتى، پروفەسسور قايرات بايبوسىنوۆ، ونەرتانۋ عىلىمدارىنىڭ دوكتورى پەرنەبەك شەگەبايەۆ، ونەرتانۋ عىلىمدارىنىڭ دوكتورى راۋشان مالدىبايەۆا جانە PhD دوكتورى اردابي ماۋلەت كەستى. ال كىتاپتىڭ قۇراستىرۋشى اۆتورلارى ماقسات مەدەۋبەك، باۋىرجان بەكمۇحانبەت. جوبا جەتەكشىسى - پروفەسسور ءاليا سابىروۆا. العى ءسوز، پىكىر جازعاندار - جانعالي ءجۇزباي مەن ساعاتبەك مەدەۋبەك.
- وسى شارانىڭ وتۋىنە مۇرىندىق بولعان ءداستۇرلى مۋزىكا ونەرى فاكۋلتەتى مەن دومبىرا كافەدراسى. بۇگىن ەكى كىتاپ پەن ءبىر كۇيتاباقتىڭ تۇساۋى كەسىلدى. «جەتىسۋدىڭ وڭتۇستىك- شىعىسىنداعى كۇيشىلىك ءداستۇر» اتتى عىلىمي مونوگرافيا قازاق جانە ورىس تىلدەرىندە جارىق كوردى. «كۇي شاقىرتقى» اتتى كۇي جيناعىندا بازارالى مۇپتەكەيەۆتىڭ ورىنداعان كۇيلەرىن توپتاستىردىق. وسىدان بولەك 25 كۇي ەنگىزىلگەن اۋديو نۇسقاسىن شىعاردىق. بۇل شەرتپە كۇي شەبەرى بازارالى مۇپتەكەيەۆ ەڭبەكتەرىنىڭ جاستارعا بەرەرى مول، قۇندى جيناق، - دەيدى بەلگىلى كۇيشى جانعالي ءجۇزباي.
aikyn.kz
