ش ق و-دا اۆتوبۋس قار كوشكىنىنىڭ استىندا قالعانى راس پا - قازسەلدەن قورعاۋ ءتۇسىندىردى

وسكەمەن. قازاقپارات - «قازسەلدەن قورعاۋ» كاسىپورنىنىڭ وكىلدەرى شىعىس قازاقستان وبلىسىندا تاۋ اراسىندا اۆتوبۋس تاپ بولعان وقيعاعا تۇسىنىك بەردى، دەپ حابارلايدى قازاقپارات ءتىلشىسى.

وقيعا 18-اقپان كۇنى گلۋبوكوە اۋدانىنداعى «يزۋمرۋدنىي» شيپاجايىنىڭ ماڭىندا بولعان.

ق ر توتەنشە جاعدايلار مينيسترلىگى «قازسەلدەن قورعاۋ» م م شىعىس قازاقستان وبلىستىق فيليالى باسشىسىنىڭ ورىنباسارى سوۆەتبەك ستانبەكوۆتىڭ ايتۋىنشا، ءدال وسى ۋچاسكەدە بۇعان دەيىن ءۇش رەت جاساندى جولمەن قار كوشكىنى تۇسىرىلگەن.

«قار كوشكىنى تۇسىرىلگەننەن كەيىن دە تاۋ بوكتەرىندە قار قالادى. وعان قوسا سول كۇنى قاتتى جەل سوعىپ تۇردى. جولعا قۇلاعان قار بيىكتىگى 15-20 سانتيمەترگە جەتكەن. اۆتوبۋس سول جەردە قارعا باتىپ قالعان بولۋى كەرەك. قار كوشكىنى جۇرگەن جوق. سەبەبى كوشكىن اۆتوبۋستى باسىپ قالسا سونشا ادام ول جاقتا ەمىن-ەركىن جۇرە الماس ەدى، اۆتوبۋس بىردەن جول جيەگىنە شىعىپ كەتەر ەدى»، - دەپ ءتۇسىندىردى ول.

سوۆەتبەك ستانبەكوۆ سول كۇنى كەشكى ساعات 18.00 دە فيليال قىزمەتكەرلەرىنىڭ وقيعا ورنىنا كەلىپ جەتكەنىن ءمالىم ەتتى.

تۇنگى ساعات 02.00 گە دەيىن پاترۋلدەگەندە قار كوشكىنى جۇرمەگەن.

ايتا كەتەيىك، «يزۋمرۋدنىي» شيپاجايى وسكەمەن قالاسىنان 30 شاقىرىمداي جەردە ورنالاسقان.