تۇركيادا ءىز-ءتۇزسىز جوعالعان قازاقستاندىقتار بار ما – س ءى م جاۋابى
بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى قازاقپارات ءتىلشىسى.
«2023-جىلعى 8- اقپاندا حاتاي ولكەسىنىڭ انتاكيا قالاسىندا ىزدەۋ جۇمىستارىنىڭ ناتيجەسىندە تۇركيا قۇتقارۋشىلارى قازاقستان ازاماتى سابينا مامادياروۆانى قيراعان ۇيدەن تاۋىپ، شۇعىل تۇردە ادانا قالاسىنداعى «Ceyhan» اۋرۋحاناسىنا جەتكىزدى. وزدەرىڭىز بىلەتىندەي، ونىڭ زاقىمدالعان قولىنا وپەراتسيا جاسالدى. انتالياداعى باس كونسۋلىمىز وعان جەكە بارىپ قايتتى، دارىگەرىمەن سويلەستى. ءقازىر ول ءالى دە دارىگەرلەردىڭ باقىلاۋىندا، جانىندا تۋىستارى بار»، - دەدى رەسمي وكىل ۆەدومستۆودا وتكەن اپتالىق بريفينگ بارىسىندا.
سونىمەن قاتار ول تۇركياداعى جەر سىلكىنىسى كەزىندە قازا تاپقان وتانداستارىمىزدىڭ تۋىستارىنا مايىتتەردى وتانىنا جەتكىزۋگە كومەك كورسەتىلگەنىن اتاپ ءوتتى.
«بۇگىنگى تاڭدا تۇركيادا جەر سىلكىنىسى سالدارىنان جوعالعان ق ر ازاماتتارى تۋرالى قوسىمشا اقپارات كەلىپ تۇسكەن جوق. دەگەنمەن، ديپلوماتتارىمىز جەرگىلىكتى بيلىكپەن بايلانىستا جانە قازا تاپقاندار مەن زارداپ شەككەندەردىڭ تىزىمدەرىن مۇقيات تەكسەرىپ كەلەدى»، - دەدى ايبەك سمادياروۆ.
