بالالارعا بەرىلەتىن اتا-انا قولحاتى وزگەرتىلمەك

استانا. قازاقپارات - ەلىمىزدە كامەلەت جاسىنا تولماعان بالالار مەن جاس وسپىرىمدەر الىس جولعا شىققاندا جاۋاپتى ادام اتا-اناسىنىڭ قولحاتىن الۋى ءتيىس. ونىڭ زاڭدىق كۇشى بار.

بۇگىندە اتالعان مىندەت قايتا قارالىپ، وزگەرىس ەنگىزىلگەلى جاتىر.

بۇل تۋرالى ادىلەت ۆيتسە- ءمينيسترى بەكبولات مولدابەكوۆ ءمالىم ەتتى، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا ءتىلشى «ءوزىڭىز بىلەتىندەي، بالالار اتا-اجەسى نەمەسە باسقا دا جاقىندارىمەن الىس جولعا شىققاندا مىندەتتى تۇردە اتا-اناسىنىڭ نوتاريۋسپەن بەكىتىلگەن قولحاتى تالاپ ەتىلەدى. بۇل ادامنىڭ قولىن بايلايدى. وسى پروتسەستى سيفرلاندىرۋ مۇمكىن بە؟»، دەگەن سۇراق قويدى.

ساۋالعا ادىلەت ۆيتسە-ءمينيسترى بەكبولات مولدابەكوۆ پىكىر ءبىلدىردى.

«وزەكتى ماسەلە شىنىمەن دە. ءبىز بۇل ماسەلەنى قازىر قاراپ جاتىرمىز. باسقا مەملەكەتتەرگە قالاي شەشىلىپ جاتىر دەگەن سياقتى. كەلەسى ءبىر كەزدەسۋدە ءسىز كوتەرگەن ماسەلەگە قاتىستى جاقسى ءبىر ۇسىنىسپەن شىعامىز دەپ ويلايمىن»، - دەدى ءمينيستردىڭ ورىنباسارى.

بۇعان دەيىن بەكبولات مولدابەكوۆ حابارلاعانداي، سوڭعى ەكى اپتادا 440 جۇپ موبيلدى قوسىمشا ارقىلى نەكە قيدىرعان.

ونىڭ ايتۋىنشا، نەكە قيۋدان باسقا دا مەملەكەتتىك قىزمەتتەر بويىنشا موبيلدى قوسىمشانىڭ كومەگىنە جۇگىنۋگە بولادى.