قىتاي باسشىلىعى كوروناۆيرۋستى جەڭگەنىن جاريالادى
بۇل تۋرالى قازاقپارات «شينحۋا» اگەنتتىگىنە سىلتەمە جاساپ حابارلايدى.
«قىتاي باسشىلىعى كوروناۆيرۋسپەن كۇرەستە «ۇلكەن جانە شەشۋشى جەڭىسكە جەتكەنىن» جاريالادى. 17-اقپان، جۇما كۇنى ق ك پ و ك ساياسي بيۋروسىنىڭ تۇراقتى كوميتەتىنىڭ وتىرىسىنان كەيىن جاريالانعان مالىمدەمەدە قىتاي قاراشا ايىنان باستاپ سالىستىرمالى تۇردە قىسقا مەرزىمدە پاندەميادان قالىپتى ومىرگە «ءمىنسىز كوشكەنىن» مالىمدەدى. تاجىريبە و ك-نىڭ پاندەمياعا قاتىستى جاعدايدى باعالاۋدا دۇرىس شەشىمدەر مەن ستراتەگيالىق تۇزەتۋلەر قابىلداعانىن دالەلدەدى»، - دەلىنگەن قۇجاتتا.
جيىن ق ح ر ءتوراعاسى شي جينپيڭنىڭ توراعالىعىمەن ءوتتى.
قىتاي مەملەكەتتىك ب ا ق- تىڭ حابارلاۋىنشا، كوروناۆيرۋس پاندەمياسى كەزىندە ەلدە 200 ملن- نان استام اۋرۋ جۇقتىرعان ادامعا مەديتسينالىق كومەك كورسەتىلدى، 800 مىڭعا جۋىق اۋىر ناۋقاس ەمدەلدى، بۇل رەتتە «قىتايدا COVID-19 ۆيرۋسىنان ءولىم دەڭگەيى الەم بويىنشا ەڭ تومەن بولدى».
«قىتاي ادامزات تاريحىندا عاجايىپ جاسادى»، - دەپ حابارلايدى شينحۋا اگەنتتىگى.
سونداي-اق اگەنتتىك قىتايداعى جاعداي جاقسارىپ، ۆيرۋس الەمنىڭ باسقا بولىكتەرىندە تارالىپ، مۋتاتسيالانۋىن جالعاستىرۋىن اتاپ ءوتتى.
جەلتوقسان ايىنىڭ باسىندا ق ح ر ۇكىمەتى لوكداۋن، ءماجبۇرلى كارانتين جانە حالىقتى جاپپاي تەستىلەۋ ارقىلى كوروناۆيرۋسقا قاتاڭ نولدىك توزىمدىلىك ساياساتىن الىپ تاستادى. قوعامدىق دەنساۋلىق ساقتاۋ شەنەۋنىكتەرىنىڭ باعالاۋىنشا، سودان بەرى ءبىر ميللياردتان استام ادام ۆيرۋس جۇقتىرعان.
ءولىم تۋرالى دەرەكتەر ەندى جاريالانباۋدا.
Deutsche Welle اگەنتتىگىنىڭ حابارلاۋىنشا، رەسمي مالىمەتتەر بويىنشا، جەلتوقساننىڭ باسىنان اقپاننىڭ باسىنا دەيىن اۋرۋحانالاردا تەك 83150 ءولىم جاعدايى تىركەلگەن.
بۇعان دەيىن قىتايدا كوروناۆيرۋس جۇقتىرعان ناۋقاستاردى ورتالىقتاندىرىلعان وقشاۋلاۋ جويىلعانى حابارلانعان بولاتىن. 2023 -جىلدىڭ 8-قاڭتارىنان باستاپ قىتايعا كەلەتىن ادامدار ءۇشىن COVID-19 بويىنشا مىندەتتى كارانتين تالابى جويىلعان. سودان كەيىن قىتاي قازاقستانمەن شەكاراداعى كارانتيندىك شەكتەۋدى الىپ تاستادى. COVID-19 شەكتەۋلەرى الىنعان سوڭ قىتايعا كىرەتىن ادامدار سانى %50 عا ءوستى.
جەلتوقسان ايىندا كوروناۆيرۋسقا قارسى شەكتەۋلەر جەڭىلدەتىلگەننەن بەرى قىتاي العاش رەت كوۆيدتەن قايتىس بولعان ادامدار سانى تۋرالى دەرەكتەر جاريالاپ، ءبىر ايدا 60 مىڭعا جۋىق ءولىم جاعدايى تۋرالى حابارلادى. د د س ۇ قىتايدى COVID-19 ىندەتى تۋرالى جاڭا دەرەكتەردى جاريالاۋعا شاقىردى.
فوتو: ا ر
