تۇركيادا جەر سىلكىنىسى كەزىندە اتاتۇرىكتىڭ سۋرەتتەرى قيراماعانى راس پا؟
الەۋمەتتىك جەلى قولدانۋشىلارى اتاتۇرىكتىڭ پورترەتتەرى، بيۋستتەرى مەن مۋرالدارى جەر سىلكىنىسى كەزىندە قيراماعانىن ايتىپ، مۇنى ساياساتكەردىڭ ءتىرى كەزىندەگى قىزمەتى مەن جەتىستىكتەرىمەن بايلانىستىرعان. الايدا بۇل دالەلدەنبەگەن، - دەپ حابارلايدى Factcheck.kz.
باسىلىم مالىمەتىنشە، قانشا ەسكەرتكىش امان قالعانىن دا ەسەپتەۋ مۇمكىن ەمەس.
«دالەلدەنبەگەن. اشىق دەرەككوزدەردە مۇستافا كەمەلدىڭ جەر سىلكىنىسىنەن قيراعان عيماراتتارداعى پورترەتتەرى مەن بيۋستتەرىنىڭ سانى تۋرالى باسپا ءسوز قۇرالدارىندا جاريالانعان سۋرەتتەردەن باسقا مالىمەت جوق. اپات اۋماعىنداعى باسقا كارتينالار، مۇسىندەرمەن سالىستىرعاندا اتاتۇرىكتىڭ قانشا ەسكەرتكىشى امان قالعانىن ەسەپتەۋ دە مۇمكىن ەمەس. سايكەسىنشە، تەك مۇستافا كەمەلدىڭ پورترەتتەرى مەن بيۋستتەرى ەرەكشە جاعدايلارعا توتەپ بەرە الادى دەپ بولجاۋعا بولمايدى»، - دەلىنگەن حابارلامادا.
سونداي-اق، جەر سىلكىنىسى كەزىندە قانداي دا ءبىر زاتتىڭ امان قالۋى ءارتۇرلى جاعدايدا بايلانىستى بولادى ەكەن.
«زاتتاردىڭ امان قالۋىنا اسەر ەتەتىن فاكتورلاردى دا ەسكەرۋ كەرەك: مىسالى، پورترەتتەر كوتەرگىش قابىرعالاردا جانە جاقتاۋدا، ال كىتاپتار ىشىندەگىنى قورعاپ قالعان شكاف، ۇستەل نەمەسە سورەلەردە تۇرۋى مۇمكىن؛ جوعارىداعى سۋرەتتەگى بيۋست عيماراتتىڭ ورتاسىندا، قابىرعادان الىس ورنالاسۋى مۇمكىن؛ مۋرالداردىڭ ءبىرى قابىرعانىڭ تومەنگى جاعىندا كونسترۋكتسيانى قورعاپ تۇرعان ارقالىقتا سالىنعان؛ ال باسقاسى عيمارات قابىرعاسىنىڭ ۇساق پليتكاسىنان تۇرادى، سۋرەتكە قاراعاندا جەر سىلكىنىسىنەن از عانا زارداپ شەككەن (تەرەزەلەر دە، بالكون دا امان قالعان)»، - دەلىنگەن حابارلامادا.
وسىنداي اپات كەزىندە ونىڭ سۋرەتتەرى مەن ەسكەرتكىشتەرىنىڭ بۇلىنبەۋىن قانداي دا ءبىر تىلسىممەن بايلانىستىرۋ تاڭعالدىراتىن ءىس ەمەس ەكەن. ويتكەنى ول تۇرىكتەر اراسىندا ەرەكشە قۇرمەتكە يە.
«اتاتۇرىك جەتىستىكتەرى مەن ونىڭ سۋرەتتەرىنىڭ امان قالۋى اراسىندا ەرەكشە بايلانىس بارىن ايتۋ يلليۋزور كوررەلياتسيا كورىنىسى بولۋى مۇمكىن. يلليۋزور كوررەلياتسيا - وقيعالار اراسىندا ايتارلىقتاي بايلانىس بارىن اسىرا سىلتەپ كورسەتۋدەن بايقالاتىن تابيعي كوگنيتيۆ بۇزىلىس. زەرتتەۋلەر ادامدا كۇيزەلىس دەڭگەيى جوعارى، وقيعانى باقىلاۋى تومەن بولعان سايىن ولاردىڭ يلليۋزور كوررەلياتسياعا كوبىرەك بەيىم بولاتىنىن كورسەتتى. دەسە دە مۇستافا كەمەل - وتە تانىمال ادام، «ۇلت اتاسى» («اتاتۇرىك» ءسوزىنىڭ ءوزى «تۇرىكتەردىڭ اتاسى» نەمەسە «ۇلى تۇرىك» دەگەن ماعىنا بىلدىرەدى) جانە تۇركيادا ونى قاتتى قۇرمەت تۇتادى. سوندىقتان مەملەكەت ءۇشىن قيىن كەزەڭدە ادامداردىڭ ەرەكشە ادامعا بايلانىستى زاتتارعا نازار اۋدارىپ، وعان ەرەكشە قاسيەت بەرىپ جاتقانى تاڭعالدىرمايدى»، - دەلىنگەن جازبادا.
