تۇركى مەملەكەتتەرى ەكونوميكالىق ىنتىماقتاستىقتى كۇشەيتۋگە نيەتتى

«قازىرگى ۋاقىتتا بارىنشا تىعىز ىنتىماقتاستىقتى جولعا قويۋ ارقىلى ەكونوميكالىق زەرتتەۋلەر ورتالىقتارىنىڭ اراسىنداعى بايلانىستى كۇشەيتۋ قاجەت. ءبىزدىڭ ويىمىزشا، وعان سول ينستيتۋتتار مەن ساراپشىلار اراسىندا جەلى قۇرۋ ارقىلى قول جەتكىزۋگە بولادى»، - دەدى حالىقارالىق تۇركى اكادەمياسىنىڭ پرەزيدەنتى شاھين مۇستافايەۆ.

ونىڭ اتاپ وتۋىنشە، سوڭعى بىرنەشە جىلدىڭ ىشىندە تۇركى مەملەكەتتەرى اراسىنداعى ىنتىماقتاستىق جاقسارا تۇسكەن.

«وعان وڭايلىقپەن قول جەتكىزىلگەن جوق. ول ساياسي كوشباسشىلارىمىزدىڭ سارابدال ساياسي شەشىمدەرى ارقىلى رەت- رەتىمەن، بىرتىندەپ جۇزەگە اسىرىلدى. 2021 -جىلى تۇركى الەمىن دامىتۋ باعدارلاماسى قابىلدانعاننان كەيىن تۇركى مەملەكەتتەرىنىڭ كوشباسشىلارى ىنتىماقتاستىق دامىتۋ جونىندە مىندەتتەمە الدى»، - دەدى اكادەميا پرەزيدەنتى.

سونىمەن قاتار ول وتكەن جىلى سامارقاند قالاسىندا تۇركى مەملەكەتتەرى اراسىنداعى ينتەگراتسيانى ودان ارى كۇشەيتۋ جونىندەگى فورۋم وتكەنىن جانە وندا 2022-2040 -جىلدارعا ارنالعان دامۋ ستراتەگياسى قابىلدانعانىن ەسكە سالدى.

«ەندى ەلدەرىمىزگە اتالعان باستامانى جۇزەگە اسىرۋ ءۇشىن ناقتى يدەيالار تالاپ ەتىلەدى. قازىر ۇكىمەتتەرىمىزگە وڭتايلى شەشىمدەر ىزدەۋگە كومەكتەسۋىمىز ءۇشىن سەرىكتەستىك قاجەت. حالىقارالىق تۇركى اكادەمياسىنىڭ پرەزيدەنتى رەتىندە ەكونوميكالىق ماسەلەلەرگە بارىنشا نازار اۋدارۋعا قاتىستى ناقتى كوزقاراسىم بار. تۇركى اكادەمياسى تۇركى مەملەكەتتەرى اراسىنداعى ەكونوميكالىق ءوزارا ءىس- قيمىلدى تالقىلاۋ ءۇشىن الاڭ ۇسىنا الادى»، - دەدى شاھين مۇستافايەۆ.

اۆتور

مارلان جيەمباي