وزبەكستان ۇيىمدارعا تۇراقسىز مەملەكەت پە؟

استانا. قازاقپارات - كورشىلەس مەملەكەتتەردىڭ ءبىرى وزبەكستاننىڭ حالىقارالىق ۇيىمدارمەن قارىم-قاتىناسى تۋرالى ءجيى ايتىلادى. وزبەكستان تۇراقسىز مەملەكەت پە؟

حالىقارالىق ۇيىمداردىڭ بەلگىلى ءبىر ماقساتقا قۇرىلىپ، مۇشە مەملەكەتتەردىڭ مۇددەسىنە ساي جۇمىس ىستەيتىنى بەلگىلى. حالىقارالىق دەڭگەيدەگى كەز كەلگەن ۇيىمنىڭ جارعىسىندا قانداي دا ءبىر مەملەكەتتىڭ كۇشتەپ ەنگىزىلمەيتىنى تۋرالى جازىلادى. ياعني مەملەكەتتەردىڭ ۇيىمعا مۇشە بولۋى ەرىكتى تۇردە بولادى. ءدال وسىنداي پرينسيپتەرمەن وزبەكستاننىڭ بىرنەشە ۇيىمنىڭ قۇرامىنان شىعىپ كەتكەنى راس.

مىسالى، ۇجىمدىق قاۋىپسىزدىك شارتى ۇيىمىنا (ول كەزدە كەلىسىم) 1992- جىلدىڭ 15- مامىرىنان 1999- جىلدىڭ 2- ساۋىرىنە دەيىن عانا مۇشە بولدى. ال 2006- جىلدىڭ 16- تامىزىندا وزبەك ەلى اتالعان ۇيىمنىڭ قاتارىنا قايتا ەندى. ءوزىنىڭ مۇشەلىگىن 2012 -جىلى قايتا توقتاتتى.

ەۋرازيالىق ەكونوميكالىق قاۋىمداستىققا 2006- جىلى مۇشە بولعان كورشى ەلى ەۋرازەق-تەن 2008- جىلى شىعىپ كەتتى. ال 1997- جىلى گۇرجىستان، ۋكراينا، ءازىربايجان جانە مولدوۆا قۇرعان گۋام ۇيىمىنىڭ قاتارىنا وزبەكستان 1999- جىلى قابىلدانعان بولاتىن. ۇيىم اتاۋى گۋۋام بولىپ تا وزگەرتىلدى. الايدا پرەزيدەنت يسلام كارىموۆتىڭ شەشىمىمەن 2005- جىلى اتالعان ۇيىمنان دا شىقتى.