نازاربايەۆ زياتكەرلىك مەكتەپتەرى «جۋساندى» ەلگە قايتارۋعا قاتىستى مالىمدەمە جاسادى

استانا. قازاقپارات - «نازاربايەۆ زياتكەرلىك مەكتەپتەرى» قارجىلاندىرۋ كوزى تۋرالى مالىمدەمە جاسادى، دەپ حابارلايدى قازاقپارات.

ۆەدومستۆونىڭ حابارلاماسىنا سەنسەك، زياتكەرلىك مەكتەپتەر نەگىزىنەن مەملەكەت بولەتىن قاراجات ەسەبىنەن ءوز جۇمىسىن جالعاستىرىپ جاتىر.

دەربەس ءبىلىم بەرۋ ۇيىمىن بيۋدجەتتىك قارجىلاندىرۋ تۇراقتى ءجۇرىپ جاتىر.

«سونىمەن قاتار زياتكەرلىك مەكتەپتەردى ودان ءارى دامىتۋ ءۇشىن بيۋدجەتتەن تىس قاراجات ەسەبىنەن قارجىلاندىرۋ ۇلەسىن بىرتىندەپ ۇلعايتۋ جوسپارلانعان. بيۋدجەتتەن تىس قارجىلاندىرۋدى ۇلعايتۋ زياتكەرلىك مەكتەپتەردەگى ءبىلىم ساپاسىن جاقسارتۋعا، وقۋشىلار مەن پەداگوگتەر ءۇشىن ءبىلىم بەرۋ پروتسەسىنىڭ جايلىلىعىن ارتتىرۋعا مۇمكىندىك بەرەدى دەپ بولجانعان بولاتىن. بيۋدجەتتەن تىس كوزدەردەن قارجىلاندىرۋدىڭ بولماۋى بەلگىلى ءبىر دارەجەدە NIS ەكوجۇيەسىنىڭ ودان ءارى سەرپىندى دامۋ مۇمكىندىكتەرىن شەكتەيدى» دەپ ءمالىم ەتتى ۇيىم.

«نازاربايەۆ زياتكەرلىك مەكتەپتەرى» Jusan توبىنا قاتىستى ءىس بويىنشا پروكۋراتۋرامەن تىعىز بايلانىستا.

«ماسەلەنىڭ سوڭى بۇكىل رەسپۋبليكاداعى زياتكەرلىك مەكتەپتەر وقۋشىلارىنىڭ پايداسىنا شەشىلەدى دەپ سەنەمىز» دەيدى ن ز م.

ەسكە سالا كەتەيىك، كەشە باس پروكۋراتۋرا Jusan توبىن قازاقستانعا قايتارۋ جۇمىسى جۇرگىزىلىپ جاتقانىن حابارلادى.

2020 -جىلعى 27- ساۋىردە Jusan توبىنىڭ يەسى «Pioneer Capital Invest» ج ش س قاتىسۋشىلارىنىڭ جالپى جينالىسىندا Pioneer مۇلكىن شەتەلدە تىركەلگەن Jusan Technologies Ltd كومپانياسىنىڭ جارعىلىق كاپيتالىنا بەرۋدى ماقۇلداۋ تۋرالى شەشىم قابىلداعان.

بۇل ارەكەتتەر قوعامدىق مۇددەگە، ونىڭ ىشىندە «نازاربايەۆ ۋنيۆەرسيتەتى» مەن «نازاربايەۆ زياتكەرلىك مەكتەپتەرىنىڭ» ونداعان مىڭ قازاقستاندىق ستۋدەنتى مەن وقۋشىلارىنىڭ مۇددەسىنە قاۋىپ ءتوندىردى.

سەبەبى «Jusan» توبىنىڭ اكسيالارى، وبليگاتسيالارى مەن دەپوزيتتەرى بويىنشا ديۆيدەندتەرى - اتالمىش وقۋ ورىندارىن قارجىلاندىرۋ كوزدەرىنىڭ ءبىرى.

فوتو: nis.edu.kz