تەرروريزم تۋرالى جالعان حابار بەرگەن ادامدى ءبىر تاۋلىكتە انىقتاي الامىز - ەلوردا پوليتسياسى
بۇل تۋرالى پوليتسيا دەپارتامەنتى ەكسترەميزمگە قارسى ءىس-قيمىل باسقارماسىنىڭ باستىعى دانيار شىمىرقۇلوۆ ايتتى، دەپ حابارلايدى قازاقپارات ءتىلشىسى.
باسقارما باسشىسىنىڭ ايتۋىنشا، قىلمىستىڭ بۇل ءتۇرى كوپتەگەن مەملەكەتتىك ورگانداردىڭ جۇمىسىنا جانە ادامدار كوپ جينالاتىن جەرلەردە قيىندىقتار تۋعىزاتىن ورتاشا اۋىر قىلمىس ساناتىنا جاتادى.
«كوپ جاعدايدا تەرروريزم اكتىسى تۋرالى مۇنداي حابارلامالار راستالمايدى. نەگىزىنەن مۇنداي قوڭىراۋلار جاس وسپىرىمدەردەن، ماس كۇيدەگى ازاماتتاردان كەلەدى. سوڭعى ۋاقىتتا ۇيىمداردىڭ اتىنا ەلەكتروندى پوشتا ارقىلى حابارلامالار تۇسەتىن جاعدايلار جيىلەگەن. مىسالى، جاقىندا Binom مەكتەبىندە د. ەسىمدى جاس ءوسپىرىم ساباققا قاتىسپاۋ ءۇشىن مەكتەپتىڭ ەلەكتروندى پوشتاسىنا بومبا تۋرالى حات جىبەرگەن»، - دەدى سپيكەر پوليتسيا دەپارتامەنتىندە وتكەن بريفينگتە.
كەيبىر ازاماتتار سانالى تۇردە كەز كەلگەن ۇيىمنىڭ قىزمەتىنە كەدەرگى جاساۋ ءۇشىن وسىنداي حابارلامالار نەمەسە قوڭىراۋلار جىبەرەدى.
«پوليتسياعا مۇنداي حابارلامالاردى انىقتاۋ قيىن ەمەس، الايدا ونى جىبەرگەن ادام جاۋاپقا تارتىلادى. ءبىر تاۋلىكتە ولاردىڭ اتى-ءجونىن زاماناۋي تەحنولوگيالاردىڭ كومەگىمەن انىقتايمىز. 2022-جىلى 102 ارناعا 157 قوڭىراۋ ءتۇستى. ونىڭ ىشىندە 15 قوڭىراۋ بويىنشا قىلمىستىق ءىس تىركەلدى، بارلىق ازاماتتىڭ اتى-ءجونى ءبىر تاۋلىك ىشىندە انىقتالدى. 2023-جىلى 7 قوڭىراۋ كەلىپ ءتۇستى، ءالى قىلمىستىق ىستەر تىركەلمەگەن»، - دەپ تولىقتىردى دانيار شىمىرقۇلوۆ.
