سەناتور شەكاراشىلاردىڭ جۇمىسىنا ءتيىستى جاعداي جاساۋدى سۇرادى
دەپۋتاتتىڭ سوزىنە قاراعاندا، 251 شەكارا بولىمشەسىنىڭ تەك 106 سى تيپتىك كەشەندە، ال 145 ءى سۋ، گاز جانە ەلەكتر قۋاتىنا قاتىستى پروبلەمالارى بار بەيىمدەلگەن عيماراتتاردا ورنالاسقان. وسى ورايدا شەكارا قىزمەتىندە جۇرگىزىلىپ جاتقان رەفورمالار مەن اسكەري قىزمەت وتكەرۋدىڭ جاعدايىن جاقسارتۋ بويىنشا اتقارىلعان جۇمىستارعا قاراماستان، بۇل پروبلەمالار شەكاراشىلاردىڭ مورالدىق-پسيحولوگيالىق جاعدايىنا اسەر ەتىپ وتىر.
وسى ماسەلەلەردى شەشۋ ءۇشىن 2020-جىلى ءتيىستى جول كارتاسى قۇرىلىپ، مەملەكەتتىك ساراپتامادان وتكەن جوبالاۋ-سمەتالىق قۇجات جاسالدى. الايدا بۇل ماسەلەلەر ءالى شەشىمىن تاپقان جوق. سەناتور بۇل تۇرعىدا ەلىمىزدىڭ شەكاراسىن قورعاۋعا ۇلەس قوسىپ جۇرگەن شەكاراشىلاردىڭ جاعدايىن جاقسارتۋدى سۇرادى.
«مەملەكەتتىك شەكارا قىزمەتتەرىنىڭ ماتەريالدىق-تەحنيكالىق بازاسى مەن الەۋمەتتىك نىساندارىن ارنايى ۇكىمەتتىك كوميسسيا اياسىندا تەكسەرۋدى، «جول كارتاسىنا» ەنگىزىلگەن شەكارا باسقارماسىنىڭ عيماراتتارى مەن نىساندارىنا قاتىستى جەرگىلىكتى اتقارۋشى ورگانداردىڭ جۇمىسىن قايتا قاراۋدى جانە شەكاراشىلاردىڭ الەۋمەتتىك-تۇرمىستىق جاعدايىن ءتيىستى باعدارلامالىق قۇجاتتار اياسىندا جاقسارتۋ جۇمىستارىن جەدەلدەتىپ ىسكە اسىرۋدى قامتاماسىز ەتۋدى ۇسىنامىن»، - دەدى جانبولات جورگەنبايەۆ پرەمەر-مينيستر ءاليحان سمايىلوۆتىڭ اتىنا جولداعان دەپۋتاتتىق ساۋالىندا.
بۇدان بۇرىن حابارلانعانداي، بۇگىن سەناتتىڭ جالپى وتىرىسىندا «قازاقستان ۇكىمەتى مەن قىرعىزستان ۇكىمەتى اراسىنداعى شەكارالىق وكىلدەردىڭ قىزمەت ۋچاسكەلەرى تۋرالى حاتتامانى راتيفيكاتسيالاۋ تۋرالى» زاڭ ماقۇلداندى.
