سەنات قازاقستان مەن قىرعىزستان شەكارا ۋچاسكەلەرىنە قاتىستى زاڭدى ماقۇلدادى

حاتتامانىڭ نەگىزگى ماقساتى - قازاقستان رەسپۋبليكاسى مەن قىرعىز رەسپۋبليكاسىنىڭ شەكارالىق وكىلدەرى ءوز فۋنكتسيالارىن ورىنداۋعا جاۋاپتى بولاتىن مەملەكەتتىك شەكارا ۋچاسكەلەرىنىڭ اۋماقتىق شەكتەرىن ايقىنداۋ. وسى ورايدا 2019-جىلعى 20- مامىردا بىشكەكتە جاسالعان ەكى مەملەكەت اراسىنداعى حاتتامانى قولدانىسقا، زاڭدىق كۇشىنە ەنگىزۋ ەسكەرىلگەن.

حاتتاماعا سايكەس قازاقستان رەسپۋبليكاسىنىڭ ۇكىمەتى مەن قىرعىز رەسپۋبليكاسىنىڭ ۇكىمەتى مىناداي ۋچاسكەلەردى ايقىندادى:

قازاقستان رەسپۋبليكاسىنىڭ جاعىنان - الماتى، قورداي جانە تاراز ۋچاسكەلەرى، ال قىرعىز رەسپۋبليكاسىنىڭ جاعىنان - ىستىقكول، شۋ جانە تالاس ۋچاسكەلەرى.

«2001-جىلعى 15- جەلتوقساندا استانا قالاسىندا جاسالعان «شەكارا وكىلدەرىنىڭ قىزمەتى تۋرالى» كەلىسىمنىڭ 2-بابىنا سايكەس، شەكارالىق وكىلدەردىڭ قىزمەت ۋچاسكەلەرى حاتتامامەن بەكىتىلۋى ءتيىس. حاتتامادا قازاقستان جاعىنان - الماتى، جامبىل وبلىستارى، قىرعىزستان جاعىنان - ىستىقكول، شۋ جانە تالاس وبلىستارى شەگىندەگى ۋچاسكەلەرى بويىنشا ءتيىستى گەودەزيالىق كوورديناتتار انىقتالىپ، قازاقستان، قىرعىزستان جانە كورشى وزبەكستان مەن قىتاي مەملەكەتتەرىنىڭ شەكارالىق ءتۇيىسۋ نۇكتەلەرى بەلگىلەنگەن. زاڭدى راتيفيكاتسيالاۋدىڭ باستى ماقساتى - قازاقستان مەن قىرعىزستان رەسپۋبليكالارىنىڭ مەملەكەتتىك شەكاراسىندا تۇراقتىلىق پەن ىنتىماقتاستىقتى قامتاماسىز ەتۋ، ءوزارا كەلىسىم مەن سەنىمدىلىكتى ارتتىرۋ»، - دەدى سەناتور عالياسقار سارىبايەۆ.

كەلىسىم الەۋمەتتىك-ەكونوميكالىق ماسەلەلەردى شەشۋگە، ءتيىمدى كورشىلىك قاتىناستاردى رەتتەۋگە، قارۋ-جاراق، وق-ءدارى، ەسىرتكى، پسيحوتروپتى، راديواكتيۆتى جانە قۇندى زاتتار مەن ۆاليۋتالاردىڭ كونترابانداسىنا قارسى كۇرەس جۇرگىزۋگە، سونداي-اق سۋ تاسقىنى، ەپيدەميا، زيانكەستەردىڭ تارالۋ قاۋىپىن بولدىرماۋعا، ادام قۇقىقتارى مەن بوستاندىقتارىن قامتاماسىز ەتۋگە، ەكى مەملەكەتتىڭ مۇددەلەرىن قورعاۋعا باعىتتالعان شەكارالىق ساياساتتى جۇرگىزۋگە مۇمكىندىك بەرەدى.