تۇركياداعى جەر سىلكىنىسى قولدان جاسالعانى راس پا
بۇل تۋرالى سيۋجەت تۇرىك تەلەارنالارىنىڭ بىرىندە كورسەتىلدى. بۇل - شىندىققا جاناسپايدى، دەپ حابارلايدى قازاقپارات Stopfake.kz-كە سىلتەمە جاساپ.
«ءىس جۇزىندە تارالعان ۆيدەو 2022 -جىلدىڭ قاراشا ايىندا تۇركيانىڭ ءبىرقاتار اۋداندارىندا 6.1 بالدىق جەر سىلكىنىسى بولعان كەزدە تۇسىرىلگەن روليكتەردەن تۇرادى. قازىر تاراتىلىپ جاتقان ۆيدەو ۇزىندىلەرى ەلدىڭ ەكى ءتۇرلى بولىگىندە تۇسىرىلگەن. اۋلاسى جارىقتاندىرىلعان ءۇيدىڭ ۆيدەوسى ديۋزدجە قالاسىندا تۇسىرىلگەن. ەكىنشىسى، كوپ ماشينالار كورسەتىلگەن اق-قارا ءتۇستى ۆيدەو بيلەدجيكتەگى وكلۋدجا اۋىلىندا تۇسىرىلگەن»، - دەپ جازادى Stopfake.
ەكىنشى ۆيدەودا كوكجيەكتە جارىق جارقىلدايدى. انىقتالعانداي، بۇل جەر سىلكىنىسىنىڭ قولدان جاسالعاندىعىنىڭ دالەلى ەمەس.
«ەرەكشە قۇبىلىسقا ناقتى تۇسىندىرمە جوق بولعانىمەن، ول قاستاندىق تەورياسىنىڭ دالەلى بولا المايدى.
بىرىنشىدەن، جارىق جارقىلداي باستاعان كەزدە جەراستى دۇمپۋلەرى بولىپ جاتقان ەدى. دەمەك، كەرىسىنشە، جىپىلىقتاعان جارىق جەر سىلكىنىسىنەن نەمەسە ونىڭ سالدارىنان تۋىنداعان.
ەكىنشىدەن، الەمدە كۇشتى جەر سىلكىنىسىن قولدان جاسايتىن تەحنولوگيا جوق.
سونىمەن قاتار كونسپيرولوگتار HAARP جۇيەسى جەر تەربەلىسىن تۋدىراتىن قۇپيا قارۋ بولۋى مۇمكىن دەگەن يدەيالاردى بىرنەشە رەت العا تارتقان ەدى. شىن مانىندە، الياسكا ۋنيۆەرسيتەتىنە تيەسىلى بۇل جۇيە جەردىڭ يونوسفەراسىن باقىلاۋعا ارنالعان. ول اۋا رايىنا، تەكتونيكالىق پليتالاردىڭ قوزعالىسىنا جانە باسقا تابيعي قۇبىلىستارعا اسەر ەتە المايدى.
قورىتا ايتقاندا، تۇركياداعى جەر سىلكىنىسى قولدان جاسالماعان. ال تارالعان ۆيدەو - بۇل مالىمدەمەنى دالەلدەمەيتىن ەسكى روليكتەر توپتاماسى»، - دەپ قورىتىندىلانعان سايتتا.
