مينيسترلىك قازمۇنايگاز بەن رەسەيلىك كومپانيانىڭ كەلىسىمشارتىنا قاتىستى تۇسىنىك بەردى

استانا. قازاقپارات – ق ر ەنەرگەتيكا ۆيتسە-ءمينيسترى اسحات حاسەنوۆ «قازمۇنايگاز» جانە «لۋكويل» كومپانيالارىنىڭ ىنتىماقتاستىعىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا «قالامقاس-تەڭىز، حازار، اۋەزوۆ» جەر قويناۋى ۋچاسكەسىن يەگەرۋدە نە سەبەپتى رەسەيلىك سەرىكتەسكە تاڭداۋ تۇسكەنى تۋرالى سۇراق قويىلدى.

ءوز كەزەگىندە اسحات حاسەنوۆ اتالعان جوبا اياسىندا رەسەيلىك كومپانيا ءتيىمدى ۇسىنىس جاساعانىن جەتكىزدى.

«وسى ورايدا اتالعان كومپانيا «قازمۇنايگازدىڭ» ستراتەگيالىق سەرىكتەسى رەتىندە انىقتالدى. وسى جوبا اياسىندا قازاقستانعا قانداي پايدا تۇسەدى؟ بىرىنشىدەن، بۇل كەن ورنىن يگەرۋ ءبىرازدان بەرى قاراستىرىلىپ كەلە جاتىر. كەزىندە ءبىز ونى كاسپي جوباسى بويىنشا كەلىسىم اياسىندا يگەرۋدى جوسپارلاعان ەدىك. ءبىراق ەكونوميكالىق تۇرعىدا ىنتالاندىرۋ تەتىكتەرى بولماعان سوڭ، وپەراتور بۇل جوبانى مەملەكەتكە قايتاردى. سوندىقتان ءتيىستى جەڭىلدىكتەر بەرۋدى كوزدەيتىن جەتىلدىرىلگەن كەلىسىمشارت مەحانيزمى ەنگىزىلدى»، - دەدى ۆيتسە-مينيستر.

ايتا كەتەيىك، بيىل 9- اقپاندا «قازمۇنايگاز» ۇ ك ا ق جانە «لۋكويل» ج ا ق كاسپي تەڭىزىنىڭ قازاقستان بولىگىندەگى «قالامقاس-تەڭىز، حازار، اۋەزوۆ» جەر قويناۋى ۋچاسكەسىن يەگەرۋ جوباسى بويىنشا ءبىرقاتار كەلىسىمگە قول قويدى.

كومپانيالار قاتىسۋشىلار كەلىسىمىنە، «Kalamkas-Khazar Operating» ج ش س جارعىلىق كاپيتالىندا %50 قاتىسۋ ۇلەسىن ساتىپ الۋ-ساتۋ شارتىنا جانە وپەراتور قىزمەتىن قارجىلاندىرۋ تالاپتارى تۋرالى كەلىسىمدى بەكىتتى.

قۇجاتتار جەر قويناۋىن پايدالانۋشىنىڭ اتالعان ۋچاسكەنى يگەرۋ بويىنشا بىرلەسكەن قىزمەتىندە قۇقىقتارى مەن مىندەتتەرىن ايقىندايدى. وسى ورايدا «لۋكويل» «قازمۇنايگازدىڭ» كاسپي قايراڭىندا جەر قويناۋىنىڭ وسى ۋچاسكەسىن يگەرۋدە ستراتەگيالىق سەرىكتەسىنە اينالدى.