جىل سايىن بالا تۋۋ ايەل اعزاسىنا قالاي اسەر ەتەدى؟ گينەكولوگ جاۋابى
قازىر رياننانىڭ تۇڭعىش بالاسىنا 9 اي بولدى. ءانشىنىڭ ناقتى جۇكتىلىك مەرزىمى بەلگىسىز، ءبىراق بالا تۋۋ اراسىنداعى ءۇزىلىس 1 جىلدان ءسال اسادى دەپ بولجاۋعا بولادى. مۇنداي جاعدايدى كوپشىلىك ايەلدەن كەزدەستىرۋگە بولادى. ءار بوسانۋ اراسىنداعى ءۇزىلىستىڭ از بولۋى ايەل مەن بالا دەنساۋلىعىنا قاۋىپسىز بە؟ جانە قالىپقا كەلۋ ءۇشىن ايەل اعزاسىنا قانشا ۋاقىت كەرەك؟
بۇل سۇراقتارعا گينەكولوگ سيۋزاننا گريگوريان Parents.ru سايتىنا جاۋاپ بەردى.
«بۇل سۇراققا جاۋاپ بەرۋ ءۇشىن ايەلدىڭ ونىڭ الدىندا تابيعي جولمەن الدە كەسار تىلىگىن جاساۋ ارقىلى بوسانعانىن ءبىلۋىمىز كەرەك. ءبىرىنشى جاعدايدا ءۇزىلىس ءتىپتى ءبىر جىلدان از بولۋى مۇمكىن. ءبىراق، ارينە، جۇكتىلىكتى ءبىر جىلدان از ۋاقىتتا جوسپارلاماعان دۇرىس. بالانىڭ دۇنيەگە كەلۋى - ءار ايەل ومىرىندەگى كەرەمەت پروتسەسس، دەسە دە، ول سونداي-اق اعزاعا ۇلكەن كۇش تۇسىرەدى. سول ءۇشىن وعان قالىپقا كەلۋ ءۇشىن جانە كەلەسى بوسانۋعا دايىندالۋ ءۇشىن مۇمكىندىك پەن ۋاقىت بەرۋ كەرەك. مىسالى، جۇكتىلىك كەزىندە جوعالتقان دارۋمەندەر مەن ميكروەلەمەنتتەردىڭ ورنىن تولىقتىرۋ كەرەك. سول سەبەپتى ءۇزىلىستىڭ 12 ايدان از بولماعانى ماڭىزدى.
ال كەسار تىلىگىنەن كەيىن ءۇزىلىس ۇزاق بولۋى كەرەك: ءبىر جارىم جىلدان ءۇش جىلعا دەيىن. بۇل كەزدە ايەلدىڭ وتادان كەيىنگى تىرتىعىنا قارايمىز. ەگەر تىگىس جىلدام جانە جاقسى جازىلعان بولسا، وندا جۇكتىلىكتى بۇل ۋاقىتتان ەرتە جوسپارلاۋعا رۇقسات بەرىلۋى مۇمكىن. كەيدە جاعداي كەرىسىنشە بولادى. سوندىقتان كەسار تىلىگىمەن بوسانعان بولساڭىز، كەلەسى جۇكتىلىكتى جوسپارلاماس بۇرىن گينەكولوگقا كورىنۋ كەرەك»، - دەدى گينەكولوگ.
دارىگەر ەگەر ايەل بوسانعاننان كەيىن كوپ ۇزاماي كوتەرىپ قالسا، بۇل جۇكتىلىكتى توقتاتۋعا كورسەتكىش ەمەس ەكەنىن ەسكەرتتى.
«ايەل بوسانعاننان كەيىن از ۋاقىتتان سوڭ تاعى بالا كوتەرىپ قويسا، قورقاتىنداي ەشتەڭە بولمايدى: ايەل ساۋ بالانى دۇنيەگە اكەلە الادى. قۇرساقتاعى ءسابي وزىنە قاجەتتىنى ءبارىبىر اناسىنان الادى. سوندىقتان جۇكتىلىك جوسپارلانباعان بولسا، بوسانعاننان كەيىن كوپ ۋاقىت وتپەي، كوتەرىپ قويساڭىز، بۇل جۇكتىلىكتى توقتاتۋعا كورسەتكىش بولىپ سانالمايدى. ارينە، ايەل اعزاسى شارشايدى، ول شاش، تىرناق، ءتىس ساۋلىعىنا اسەر ەتۋى مۇمكىن. اعزا ءوز كۇشىن قالىپقا كەلتىرۋ ءۇشىن بوسانۋ اراسىندا ءۇزىلىس بولعانى جاقسى جانە جۇكتىلىكتى جوسپارلاعان دۇرىس»، - دەپ قورىتىندىلادى سيۋزاننا گريگوريان.
massaget.kz
