وزبەكستان جانە تۇرىكمەنستانمەن شەكارادا دا ەلەكتروندى كەزەك جۇيەسى ەنگىزىلمەك

استانا. قازاقپارات - اقپان ايىنىڭ سوڭىنا دەيىن قازاقستانداعى ءتورت وتكىزۋ بەكەتىندە ەلەكتروندى كەزەك جۇيەسى ەنگىزىلمەك.

بۇل تۋرالى قازاقپارات مەملەكەتتىك كىرىستەر كوميتەتىنىڭ باسپا ءسوز قىزمەتىنە سىلتەمە جاساپ حابارلايدى.

ولاردىڭ ەكەۋى - قىتاي شەكاراسىنداعى «باقتى» (اباي وبلىسى) جانە «مايقاپشاعاي» (ش ق و) بەكەتى. «CarGoRuqsat» سەرۆيسى «باقتى» بەكەتىندە 15- اقپاننان، ال «مايقاپشاعاي» بەكەتىندە 20- اقپاننان باستاپ ىسكە قوسىلماق.

تاعى ەكى بەكەت ماڭعىستاۋدا وبلىسىندا ورنالاسقان. «تەمىر-بابا» بەكەتىندە كەزەك 22- اقپاندا، ال «تاجەن» بەكەتىندە 27- اقپاندا ەنگىزىلمەك. ءبىرىنشىسى تۇرىكمەنستانمەن، ال ەكىنشىسى وزبەكستانمەن شەكارادا.

بۇعان دەيىن قازاقستان-قىتاي شەكاراسىنداعى «دوستىق»، «نۇر-جولى» وتكىزۋ بەكەتتەرىندە ەلەكتروندى سەرۆيس ەنگىزىلگەن. بۇگىندە جۇيە ارقىلى كەزەكتى برونداۋ بويىنشا 84 مىڭ وپەراتسيا ورىندالىپ، شامامەن 7,5 مىڭ پايدالانۋشى تىركەلگەن.

سەرۆيستى جاساپ شىعارۋشىلاردىڭ ايتۋىنشا، جۇيە ۇدايى جەتىلدىرىلىپ كەلەدى. جۋىردا Face ID، ياعني ادامنىڭ كەلبەتىن سكانەرلەپ تەكسەرۋمەن تولىعىپ، شەتەلدىك ازاماتتار ءۇشىن بانك كارتاسى ارقىلى راستاۋ قىزمەتى ىسكە قوسىلماق.