ۇلتتىق قوردان بولىنەتىن اقشا: بالا قايتىس بولسا شوتىنداعى قاراجات نە بولادى؟

استانا. قازاقپارات - بىلتىر جۇرتتى ەلەڭ ەتكىزگەن، تالقىعا كەڭىنەن تۇسكەن تاقىرىپتاردىڭ ءبىرى - مەملەكەت باسشىسىنىڭ باستاماسىمەن قولعا الىنعان «ۇلتتىق قور - بالالارعا» جوباسى.

ياعني، ۇلتتىق قوردىڭ ينۆەستيتسيالىق تابىسىنىڭ 50 پايىزى بالالاردىڭ جەكە شوتىنا اۋدارىلۋى ءتيىس. دەسە دە، كەلەسى جىلدان باستاپ ىسكە قوسىلاتىن باعدارلاماعا قاتىستى ساۋال كوپ.

Massaget.kz ءتىلشىسى قارجى ۆيتسە-ءمينيسترى داۋرەن تەمىربەكوۆ ۇسىنعان دەرەكتەرگە سۇيەنىپ، ماڭىزدى سۇراقتاردىڭ جاۋابىن ىزدەپ كوردى.

ەگەر 18 جاسقا تولماعان بالا ەلدەن كەتىپ، قازاقستان ازاماتتىعىنان باس تارتسا، وندا بۇل تولەمدەردى تالاپ ەتە المايدى. بۇل قاراجات باسقا بالالاردىڭ اراسىندا قايتا بولىنەدى. سونىمەن قاتار، 18 جاسقا دەيىن بالانىڭ ازاماتتىعى وزگەرمەي، ەلدەن كەتسە، تولەمدەردى تالاپ ەتۋ قۇقىعى بۇزىلمايدى. 18 جاسقا تولعاننان كەيىن شوتتاعى قاراجات 5 نەمەسە 10 جىل بويى ساقتالادى.

اتالعان مەرزىمدە قاراجاتقا سۇراۋ سالىنباسا، شوتتاعى قاراجات وسى بالالاردىڭ زەينەتاقى شوتىنا اۋدارىلادى. ال بالا مەزگىلسىز كوز جۇمعان جاعدايدا، ازاماتتىق زاڭناماعا سايكەس، جيناقتالعان قاراجاتتى مۇراگەرلىك بويىنشا بەرۋ مۇمكىندىگى قاراستىرىلادى.