تۇركىستان وبلىسىندا اۋىل اكىمدەرى مال سانىن قولدان ءوسىرىپ، وتىرىك اقپارات بەرىپ كەلگەن

تۇركىستان. قازاقپارات - تۇركىستان وبلىسىندا اۋىل اكىمدەرى مال سانى بويىنشا بۇرمالانعان اقپارات بەرىپ، جايىلىم جەرگە دەگەن قاجەتتىلىكتى ارتىق كورسەتكەن.

مۇنداي زاڭبۇزۋشىلىقتى وبلىستىق پروكۋراتۋرا قىزمەتكەرلەرى كەزەكتى تەكسەرۋ كەزىندە انىقتادى، دەپ حابارلايدى قازاقپارات ءتىلشىسى.

قاداعالاۋشى ورگان وكىلدەرىنىڭ ايتۋىنشا، مال باسىن جاساندى تۇردە كوبەيتۋ دەرەگى ارىستىڭ بەس اۋىلدىق وكرۋگىندە تىركەلگەن.

ماسەلەن، اقدالا اۋىلدىق وكرۋگىندە جەكەنىڭ قولىنداعى 1382 مال جايىلىمعا مۇقتاج بولسا، اكىم ءوز ەسەبىندە شالعايداعى شارۋاشىلىقتىڭ دا ءتورت تۇلىگىن قوسىپ كورسەتكەن.

ءسويتىپ مالدىڭ سانىن 8817 دەپ بەرىپتى.

وسىلايشا ءتيىستى نورماتيۆتەن ارتىق جايىلىم قاجەت دەپ جالعان اقپارات ۇسىنعان.

«مال ەسەبى دۇرىس جۇرگىزىلمەۋى سالدارىنان مەملەكەتتىك ستاتيستيكا بۇزىلعان. جەر قاتىناستارى باسقارماسى ستاتيستيكاعا بەرىلگەن جالعان مالىمەتتى تەكسەرۋسىز تەك نورماتيۆتىك قاجەتتىلىككە كوبەيتۋمەن شەكتەلىپ، جايىلىم تاپشىلىعىن قولدان جاساعان»، - دەيدى وبلىستىق پروكۋراتۋرانىڭ باسقارما باستىعى نۇرجان بورانبايەۆ.

سونداي- اق، اۋىل اكىمدەرى مەن ۆەتەريناريا قىزمەتى بەرگەن مال سانى ەكى ءتۇرلى ەكەنى انىقتالعان.

جەرگىلىكتى جەرلەردە جاۋاپتىلار جايىلىمداردى قايتارۋ بويىنشا اقپاراتتىق تەحنولوگيالاردى قولدانبايتىن بولىپ شىقتى.

ءارى ماجبۇرلەپ الىپ قويۋ مەن اكىمشىلىك جاۋاپقا تارتۋ پروتسەدۋراسىن دا جۇزەگە اسىرماي كەلگەن.

بۇگىنگى كۇنگە قايتارىلعان جايىلىم كورسەتكىشتەرى باسىم بولىگى تەك ءوز ەرىكتەرىمەن قايتارۋ جانە اكىمدەردىڭ ارنايى قورداعى جەردەن ورتاق جايىلىمعا بەكىتىپ بەرۋى ەسەبىنەن ورىندالعان.