قازاقستاننىڭ گۋمانيتارلىق كومەگى تيەلگەن ءۇشىنشى رەيس سيرياعا جەتتى

اممان. قازاقپارات - قازاقستاننىڭ گۋمانيتارلىق كومەگى بار ءۇشىنشى ۇشاق دۇيسەنبى كۇنى كەشكە الەپپو اۋەجايىنا قوندى.

ۇشاقپەن ق ر ۇلتتىق ۇلانىنىڭ اۆياتسياسى بىرگە كەلدى جانە كومەكتى ازىق-تۇلىك قاۋىپسىزدىگى جونىندەگى يسلام ۇيىمى ارقىلى ۇلەستىردى، دەپ حابارلايدى قازاقپارات ءتىلشىسى ۇيىمعا سىلتەمە جاساپ.

ازىق-تۇلىك قاۋىپسىزدىگى جونىندەگى يسلام ۇيىمىنىڭ (IOFS) وكىلدەرى، ونىڭ ىشىندە ۇيىمنىڭ باس ديرەكتورى ەرلان بايداۋلەت قازىر الەپپودا.

ولار جۇكتى قارسى الىپ، ونى تاراتۋعا قاتىسىپ جاتىر.

وتكەن اپتادا ق ر پرەزيدەنتى جويقىن جەر سىلكىنىسىنەن زارداپ شەككەن سيرياعا گۋمانيتارلىق كومەك جىبەرۋدى تاپسىرعان بولاتىن.

كومەك مەملەكەتتىك ماتەريالدىق رەزەرۆتەن جاساقتالدى. جالپى العاندا، سيرياعا 50 توننا گۋمانيتارلىق جۇك جولداندى، وندا كونسەرۆىلەر، جىلى كيىم، قىسقى شاتىرلار، كەرەۋەتتەر مەن توسەك-ورىن جابدىقتارى بار.

«ءبىز گۋمانيتارلىق كومەك تاراتۋ ورتالىعىندا بولدىق، وندا دۇنيەجۇزىلىك ازىق-تۇلىك باعدارلاماسىنىڭ جانە سيريانىڭ قىزىل كرەس وكىلدەرىمەن بىرگە ونىڭ ءبىر بولىگىن جەرگىلىكتى حالىققا تاراتتىق»، - دەدى IOFS Twitter- دە.

بۇل ءزىلزالادان زارداپ شەككەن سيريا تۇرعىندارىنا قازاقستان تاراپىنان جىبەرىلگەن ءۇشىنشى ۇشاق. بۇل بورتقا ازىق-تۇلىك ارتىلعان.

بۇعان دەيىن ەكى گۋمانيتارلىق كومەك تيەلگەن ۇشاق سيرياعا شاتىرلار مەن كورپەلەر جانە زارداپ شەككەندەرگە قاجەت باسقا زاتتاردى اكەلدى.

ءبىرىنشى جۇك الەپپو اۋەجايىنا 10- اقپان كەشكە كەلدى.

تاپسىرۋ راسىمىنە الەپپو گۋبەرناتورىنىڭ ورىنباسارى، اۋەجاي ديرەكتورى، سيريا قىزىل كرەسىنىڭ وكىلدەرى جانە قازاقستاننىڭ ليۆانداعى ەلشىسى قاتىستى.

سوڭعى، ءتورتىنشى گۋمانيتارلىق كومەك ارتىلعان رەيس سيرياعا ءبىر كۇننەن كەيىن كەلەدى.