ەلوردادا اشىلعان جاڭا مەشىت تۋرالى نە بىلەمىز
«ەلوردامىز تاعى ءبىر مەشىتپەن تولىقتى. جاڭا مەشىتكە اللانىڭ 99 ەسىمىنىڭ ءبىرى ءال- فاتتاح اتاۋىن بەردىك. ول «جەڭىمپاز» دەگەندى بىلدىرەدى. اللانىڭ جاڭا ءۇيى تۇرعىنداردىڭ يمان تاربيەسىنە ۇلكەن ۇلەسىن قوسادى دەپ سەنەمىن. ارينە، مەشىت تەك قانا قۇلشىلىق ەتۋ ەمەس، بۇل رۋحاني، مادەني ورىن. مەشىت - مەيىرىم مەكەنى. تۇرعىندارى يماندى ەلدە تىنىشتىق، بەرەكە جانە بىرلىك بولادى»، - دەدى قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعان ۇلى جاڭا مەشىتتىڭ اشىلۋ سالتاناتىندا.
سونداي- اق، باس ءمۇفتي ەلوردا جۇرتىن جاڭا مەشىتتىڭ اشىلۋىمەن قۇتتىقتاي وتىرىپ، ەل يگىلىگىنە جاراۋىن تىلەدى.
نارىكبايەۆ (5/1) كوشەسىندە ورنالاسقان مەشىتتە ءبىر ۋاقىتتا 500 ادامنىڭ عيبادات ەتۋ مۇمكىندىگى بار. ونىڭ جالپى الاڭى - 713 شارشى مەتر.
ءال- فاتتاح مەشىتىندە ناماز زالىنان بولەك، ءدارىسحانا، يمامدار بولمەسى، قۇران وقۋ جانە نەكە قيۋ بولمەسى بار.
ودان بولەك، ەرلەر مەن ايەلدەر بولەك دارەتحانامەن قامتىلعان.
«ازان شاقىرىلىپ، تاڭەرتەڭ ۇيقىمىزدان وياتاتىن مەشىتتەردىڭ قاتارى كوبەيىپ جاتقانىنا وتە قۋانىشتىمىن. وسكەلەڭ ۇرپاق يماندى بولىپ، اللانىڭ تۋرا جولىمەن وسسە، ءبىز باقىتتىمىز. ءوزىم وسى ماڭايدا تۇرامىن، جاڭا مەشىت اشىلىپ جاتىر دەگەندى ەستىگەندە ۇيدە وتىرا المادىم. ەلىمىز امان، جۇرتىمىز تىنىش بولسىن»، - دەيدى مەشىتكە كەلگەن ەلوردالىق اجەي.
باس ءمۇفتيدىڭ بۇيرىعىمەن جاڭا مەشىتتىڭ باس يمامى بولىپ باعدات ابدۋلكاريموۆ تاعايىندالدى.
«بۇل مەشىتتىڭ ءبىر ەرەكشەلىگى - ەرلەر مەن ايەلدەردىڭ كىرىپ- شىعۋى مەن قۇلشىلىق ەتۋى ءۇشىن ارنايى جاعداي جاسالعان. ايەلدەر بولەك جەردەن كىرىپ شىعادى. ارينە، اجەتحاناسى دا بولەك. مەشىت شامامەن 30 سوتىق جەردى الىپ جاتىر. اۋلادا كولىكتەرگە ارنالعان اۆتوتۇراقتار قاراستىرىلعان. جالپى جاڭا مەشىت ءوز ورنىن تاپتى دەۋگە بولادى. جاماعات اشىلا سالا كوپتەپ جينالىپ جاتىر. مەشىت قىزمەتكەرلەرىنىڭ شتاتى جاساقتالۋ ۇستىندە، بۇيرىق ءالى شىققان جوق. دەگەنمەن قازىر ءبىر نايب يمام مەن ۇستاز جۇمىسقا كىرىستى»، - دەيدى باس يمام.
ايتا كەتسەك، جاڭا مەشىتتىڭ اشىلۋ سالتاناتىندا مەملەكەت جانە قوعام قايراتكەرلەرى، اقساقالدار ءسوز سويلەپ، باتا بەردى.
ەسكە سالايىق، بۇگىندە استانادا 15 مەشىت بار.
