قاسىم-جومارت توقايەۆ: قۇتقارۋ قىزمەتى - وتە ماڭىزدى سالا

كوكشەتاۋ. قازاقپارات - مەملەكەت باسشىسى م. عابدۋللين اتىنداعى ازاماتتىق قورعاۋ اكادەمياسىنا باردى، دەپ حابارلايدى قازاقپارات اقورداعا سىلتەمە جاساپ.

«حالقىمىزدىڭ اماندىعىن جانە قاۋىپسىزدىگىن ساقتاۋ - باستى مىندەت ءارى قاستەرلى پارىز. بۇل - ەڭ الدىمەن، قۇتقارۋشى ماماندارعا جۇكتەلەتىن زور سەنىم، ۇلكەن جاۋاپكەرشىلىك.

قۇتقارۋ قىزمەتى - وتە ماڭىزدى سالا. سوڭعى كەزدە جەر جۇزىندە توتەنشە وقيعالار جيىلەپ بارادى. جۇرتىمىز مۇنداي قاۋىپ-قاتەرگە ءاردايىم دايىن بولۋى كەرەك. سوندىقتان، وسى سالادا قىزمەت ەتىپ جۇرگەن مامانداردىڭ ەڭبەگى ەلىمىز ءۇشىن وتە ماڭىزدى»، - دەدى قاسىم-جومارت توقايەۆ اكادەميا كۋرسانتتارى الدىندا سويلەگەن سوزىندە.

ەلىمىزدەگى كاسىبي قۇتقارۋشىلار دايارلايتىن بىردەن-ءبىر وقۋ ورنىن شيرەك عاسىر ىشىندە 6 مىڭعا جۋىق مامان ءبىتىرىپ شىققان. اكادەميا تۇلەكتەرى بارلىق وبلىستا ەڭبەك ەتىپ ءجۇر. ولار وتان الدىنداعى بورىشىن ادال اتقارىپ كەلەدى. پرەزيدەنت كۇزدە ەلىمىزدىڭ بىرنەشە ايماعى الاپات ورتتەن زارداپ شەككەنىنە توقتالىپ، سىن ساعاتتا تۇرعىندارعا الدىمەن قۇتقارۋشىلار كومەككە جەتكەنىن اتاپ ءوتتى.

«قۇتقارۋشى بولۋ - قيىن ءارى قاتەرلى جۇمىس. شىن مانىندە، بۇل - ناعىز ەرجۇرەك ازاماتتاردىڭ كاسىبى. توتەنشە جاعداي ماماندارى جۇمىس بارىسىندا تالاي رەت ەرلىك كورسەتتى. باسقا ادامداردىڭ ومىرىنە اراشا ءتۇسىپ، قازا تاپقان قۇتقارۋشىلار از ەمەس. ولاردىڭ قاتارىندا وسى اكادەميانىڭ تۇلەگى اسقار زابيكۋلين دە بار. «ەر ەسىمى - ەل ەسىندە». باتىرلاردىڭ ەرلىگى ەشقاشان ۇمىتىلماۋعا ءتيىس»، - دەدى قاسىم-جومارت توقايەۆ.