قۇتقارۋشىلار تۇركيادان امان- ەسەن ورالعان سوڭ مىندەتتى تۇردە ماراپاتتالادى

كوكشەتاۋ. قازاقپارات - تۇركيادان امان- ەسەن ورالعان سوڭ قۇتقارۋشىلار مىندەتتى تۇردە ماراپاتتالادى. بۇل تۋرالى پرەزيدەنت قاسىم- جومارت توقايەۆ م. عابدۋللين اتىنداعى ازاماتتىق قورعاۋ اكادەمياسىندا سويلەگەن سوزىندە ايتتى، دەپ حابارلايدى قازاقپارات اقورداعا سىلتەمە جاساپ.

«جاقىندا تۇركيادا جويقىن جەر سىلكىنىسى بولعانىن بىلەسىزدەر. مەنىڭ تاپسىرماممەن باۋىرلاس تۇركيا ەلىنە قۇتقارۋشىلار جانە دارىگەرلەر جىبەرىلدى. ولاردىڭ اراسىندا اقمولا وبلىسىنىڭ ماماندارى دا بار، ياعني 18 ادام. ءبىزدىڭ قۇتقارۋشىلار بىرنەشە ادامدى امان الىپ شىقتى. تۇركيادا كۇندىز- ءتۇنى جۇمىس ىستەپ جاتقان ازاماتتارىمىزعا العىس ايتامىن! تۇركيادان امان- ەسەن ورالعان سوڭ ولاردى مىندەتتى تۇردە ماراپاتتايمىز»، - دەدى پرەزيدەنت.

ەسكە سالساق، 7- اقپان كۇنى قازاقستان ت ج م قۇتقارۋشىلارى الماتىدان جەر سىلكىنىسى سالدارىن جويۋعا كومەك كورسەتۋ ءۇشىن تۇركياعا اتتاندى. ولار 14 كۇنگە دەيىن اۆتونومدى جۇمىس ىستەي الادى.

8 -اقپان كۇنى قازاقستاندىق قۇتقارۋشىلاردىڭ ەكىنشى ەشەلونى - جەكە قۇرامنان 60 ادام، ولاردىڭ ىشىندە ت ج م قۇتقارۋشىلارى، اپاتتار مەديتسيناسى ورتالىعىنىڭ دارىگەرلەرى، كينولوگيالىق ەسەپتەر اتتاندى.

قازاقستاندىق قۇتقارۋشىلار تۇركيادا ىزدەۋ- قۇتقارۋ جۇمىستارىن جۇرگىزە باستاعالى 7 ادامدى قۇتقارىپ، مەديتسينا قىزمەتكەرلەرىنە تاپسىردى. سونداي- اق، قايتىس بولعان 80 ادامنىڭ دەنەسىن ءۇيىندى استىنان شىعاردى، ولاردىڭ جەتەۋى - بالا.

ايتا كەتسەك، بۇگىن پرەزيدەنت قاسىم- جومارت توقايەۆ تۇركيا رەسپۋبليكاسىنا قوسىمشا گۋمانيتارلىق كومەك جىبەرۋ جونىندە ۇكىمەتكە تاپسىرما بەردى.

رەداكتور

گۇلنۇر عازيز قىزى