قازاقستاننىڭ ەڭ ۇزدىك بۇركىتشىسى انىقتالدى
بۇركىتشىلەر سايىسى بويىنشا اتىراۋ وبلىسىنان قاتىسقان يمانعالي ابدۋلكارىم ۇلى جەڭىمپاز اتاندى. ەكىنشى ورىندا الماتىلىق اسەت ءادىلوۆ، ال ءۇشىنشى ورىندى سەرىكبولسىن جالعاس ۇلى (جامبىل وبلىسى) مەن دياس كۇنتۋعان (استانا قالاسى) الدى.
قارشىعانى قولعا شاقىرۋدان الماتى وبلىسىنىڭ وكىلى سەيىتجان بەكسۇلتان باس جۇلدەنى يەلەندى. جۇلدەلى ەكىنشى ورىنعا تۇركىستان وبلىسىنان كەلگەن پاڭ تولەمىرزا يە بولسا، ءۇشىنشى ورىندى ەلوردالىق ەراسىل سەرىكبەك ۇلى مەن تۇركىستاندىق مۇحاممەد نامازباي ءوزارا ءبولىستى.
يتەلگى سالۋدان تۇركىستان وبلىسىنان كەلگەن ءمۇسالىم سالمانعا تەڭ كەلەر قۇسبەگى بولعان جوق. جۇلدەلى ەكىنشى ورىندا جامبىل وبلىسىنىڭ نامىسىن قورعاعان بەرىكبولسىن باباجان، ال ءۇشىنشى ورىنعا پاڭ تولەمىرزا (تۇركىستان وبلىسى) مەن ەردانا سامعات (ش ق و) تۇراقتادى.
كوماندالىق ەسەپتە تۇركىستان وبلىسىنىڭ قۇسبەگىلەرى 1 التىن، 1 كۇمىس، 2 قولا مەدال قانجىعىلاپ، كوش باستادى. اتىراۋ جانە الماتى وبلىسىنىڭ وكىلدەرى ەكىنشى جانە ءۇشىنشى ورىنعا جايعاستى.
«جارىسقا ەلىمىزدىڭ تۇكپىر- تۇكپىرىنەن جينالدىق. قۇسبەگىلىك ونەرى قازاق حالقىنىڭ ەجەلدەن كەلە جاتقان كونە ءداستۇرىنىڭ ءبىرى ەكەنى راس. كوشپەندىلەر ومىرىنەن بەرىك ورىن العان بۇل ونەر ءتۇرى بۇگىنگى تاڭدا جاستار اراسىندا دا تانىمال. جارىسقا باپتاعان بۇركىتىمنىڭ اتى - الاباس. دايىندىققا 5-6 ايداي ۋاقىت قاجەت بولدى. جالپى، جارىستىڭ ۇيىمداستىرىلۋى كوڭىلىمنەن شىقتى. قارسىلاستارىم دا مىقتى بولدى. مۇنداي سپورتتىق شارالاردىڭ ۇلتتىق ءداستۇرىن دارىپتەيتىن، ەلىن، جەرىن سۇيەتىن ازاماتتار تاربيەلەۋدە ماڭىزى زور دەپ ەسەپتەيمىن»، - دەدى بۇركىتشىلەر اراسىندا چەمپيون اتانعان يمانعالي ابدۋلكارىم ۇلى.
چەمپيوناتقا الماتى، قاراعاندى، جامبىل، شىعىس قازاقستان، تۇركىستان، ماڭعىستاۋ، اتىراۋ، اباي، جەتىسۋ وبلىستارىنىڭ، سونداي- اق استانا جانە الماتى قالالارىنىڭ 70-كە جۋىق سپورتشىسى قاتىسقان بولاتىن.
«قۇسبەگىلىك ۇلتتىق سپورتى قازاق تاريحىندا تامىرى تەرەڭگە تاراعان ەلىمىزدىڭ ءتول مادەني قۇندىلىعى بولىپ سانالادى. قۇسبەگىلىك قر سپورت جانە دەنە شىنىقتىرۋ ىستەرى كوميتەتىنىڭ بۇيرىعىمەن ۇلتتىق سپورت ءتۇرى رەتىندە تانىلعان ساتتەن باستاپ 7 مەملەكەتتىڭ قاتىسۋىمەن 1 رەت الەم چەمپيوناتى، 2 رەت ازيا چەمپيوناتى (5 مەملەكەت)، 40-قا جۋىق حالىقارالىق تۋرنير مەن 15 رەت قازاقستان رەسپۋبليكاسىنىڭ چەمپيوناتتارى ۇيىمداستىرىلدى.
اتالعان سپورت ءتۇرى استانا، الماتى قالالارىندا جانە ەلىمىزدىڭ باسقا دا وڭىرلەرىندە تۇراقتى دامىپ كەلەدى. ءبىزدىڭ ماقساتىمىز - اتا ءداستۇرىمىزدى دارىپتەپ، سان عاسىردان بەرى ادەت- عۇرپىمىزعا ءسىڭىستى بولعان دارا ونەرىمىزدى بۇقارالىق سپورتقا اينالدىرۋ. الەمدىك دەڭگەيگە كوتەرىپ، وتانىمىزعا ساياحاتتاپ كەلۋشى تۋريستەردىڭ قىزىعۋشىلىعىن تۋعىزاتىنداي دارەجەگە جەتكىزۋ. سول باعىتتا جۇمىس اتقارىپ جاتىرمىز جانە جالعاستىرا بەرەمىز»، - دەدى رەسپۋبليكالىق قۇسبەگىلىك فەدەراتسياسىنىڭ ۆيتسە- پرەزيدەنتى جانجىگىت ومارحان.
رەداكتور
گۇلنۇر عازيز قىزى
