ءاليحان سمايىلوۆ: مەكتەپ ىشىندە دە قاۋىپ بارىن كورىپ وتىرمىز

استانا. قازاقپارات - ۇكىمەت وتىرىسىندا پەتروپاۆل قالاسىنداعى مەكتەپتە بولعان وقىس وقيعا قارالدى، دەپ حابارلايدى قازاقپارات ءتىلشىسى.

پرەمەر- مينيستر ءاليحان سمايىلوۆ اتالعان وقيعانىڭ كەلەشەكتە قايتالانباۋى ءۇشىن بىرنەشە ناقتى مينيسترلىككە تاپسىرما بەردى.

«بۇل وتە قاۋىپتى جاعداي. حالىقتىڭ اراسىندا ۇلكەن الاڭداۋشىلىق تۋدىردى. بالالاردىڭ قاۋىپسىزدىگىنە الاڭدامايتىن وتباسى جوق. مەكتەپتىڭ ىشىندە دە قاۋىپ بارىن كورىپ وتىرمىز. سوندىقتان بۇل ماسەلەنى قايتا قاراپ، وقۋ ورىندارىنا تەكسەرۋ جۇرگىزۋ قاجەت»، - دەدى ۇكىمەت باسشىسى.

سونداي- اق، ول بەينەكامەرالاردىڭ سانىن كوبەيتىپ، مەكتەپكە كىرەبەرىس جەرلەردە باقىلاۋدى كۇشەيتۋ ماسەلەسىن قاراۋ كەرەكتىگىن ايتتى.

«ىشكى ىستەر مينيسترلىگى كەلىسىلگەن ۇسىنىستاردى ەنگىزسىن. دەنساۋلىق ساقتاۋ مينيسترلىگى زارداپ شەككەن بالالاردى ەمدەۋدى ەرەكشە باقىلاۋعا السىن. وقۋ- اعارتۋ مينيسترلىگى ىشكى ىستەر جانە توتەنشە جاعدايلار مينيسترلىكتەرىمەن بىرلەسىپ، قاۋىپسىزدىك ساباقتارىن ازىرلەۋى قاجەت. بالالار ءارتۇرلى جاعدايدا وزدەرىن قالاي ۇستاۋ كەرەكتىگىن ناقتى ءبىلۋى ءتيىس»، - دەدى ول.

ەسكە سالساق، پەتروپاۆلدا 9-سىنىپ وقۋشىسى مەكتەپكە قارۋلانىپ كەلىپ، بىرنەشە بالانى جاراقاتتاعان بولاتىن.

كەشە ءتۇس كەزىندە وقيعا كەزىندە زارداپ شەككەن وقۋشىلار جانساقتاۋ بولىمىندە جاتقانى بەلگىلى بولدى.

اۆتور

ەسىمجان ناقتىباي