ەۋروپارلامەنت دەپۋتاتتارى تۇركيا مەن سيرياداعى جەر سىلكىنىسى قۇرباندارىن ءبىر مينۋتتىق ۇنسىزدىكپەن ەسكە الدى
«ەۋروپا تۇركيا مەن سيريا حالقىمەن بىرگە» دەگەن روبەرتا مەتسولا ەۋرووداقتىڭ ازاماتتىق قورعانىس مەحانيزمى ىسكە قوسىلعانىن جانە اپات ايماعىنا ەۋرووداق كومەگىنىڭ جىبەرىلىپ جاتقانىن ايتتى.
«ءبىزدىڭ ويىمىز قايتىس بولعانداردىڭ وتباسىلارىمەن، مۇقتاجدارمەن، جارالانعاندارمەن جانە تاۋلىك بويى ادامداردىڭ ءومىرىن ساقتاپ قالۋ ءۇشىن كۇرەسىپ جاتقان بارلىق قۇتقارۋشىلارمەن بىرگە»، - دەپ قوستى ول.
ستراسبۋرگ قالاسىندا وتكەن ەۋروپالىق پارلامەنتتىڭ اعىمداعى سەسسياسى كەزىندە ەۋرودەپۋتاتتار داعدارىستىق جاعدايلارعا دەن قويۋ جونىندەگى ەۋروكوميسسار يانەز لەنارچيچتىڭ بايانداماسىن تىڭدادى.
ەۋروكوميسسيا وكىلى وتكەن اپتادا تۇركيانىڭ گازيانتەپ قالاسىنداعى اپات ايماعىندا بولىپ قايتقان.
«قازىرگى ۋاقىتتا ءبىز بىلەتىن ءولىم-ءجىتىم سانى مەن قيراۋ دارەجەسى سوڭعى كەزدەردە بۇرىن- سوڭدى بولماعان»، - دەدى يانەز لەنارچيچ.
سونداي-اق ەۋرووداق جەر سىلكىنىسىنەن زارداپ شەككەن ايماقتاردى قالپىنا كەلتىرۋ ءۇشىن اعىمداعى جىلدىڭ ناۋرىز ايىندا دونورلار كونفەرەنتسياسىن وتكىزەدى دەپ جوسپارلاندى.
اشىق كوزدەردەن الىنعان فوتو
