وبلىس اكىمى مەكتەپتەگى شابۋىلدان زارداپ شەككەن بالالاردىڭ كوڭىلىن سۇراپ باردى
س ق و اكىمى ايداربەك ساپاروۆ وبلىستىق كوپبەيىندى بالالار اۋرۋحاناسىندا بولدى. ءوڭىر باسشىسى وتادان كەيىن ەستەرىن جيناعان ەكى بالامەن تىلدەستى. بۇل جايىندا ول الەۋمەتتىك جەلىدەگى پاراقشاسىندا جازدى.
«بۇگىنگى وقيعادان كەيىن اۋرۋحاناعا تۇسكەن بالالاردىڭ حال-جاعدايىن ءبىلدىم. بالالارمەن تىلدەسىپ، تەزىرەك ساۋىعىپ كەتۋىن تىلەدىم. زارداپ شەككەندەرگە قاجەتتى كومەك كورسەتىلدى، قازىر ولاردىڭ جاعدايى تۇراقتى. بالالار دارىگەرلەردىڭ باقىلاۋىندا»، - دەدى ايداربەك ساپاروۆ.
كەشە تاڭەرتەڭ پەتروپاۆلداعى №4-ورتا مەكتەپتىڭ 9-سىنىپ وقۋشىسى ساباققا وزىمەن بىرگە بالتا مەن پىشاق الا كەلىپ، جوعارى سىنىپتىڭ ءۇش بالاسىن جاراقاتتاعان ەدى.
مەكتەپكە قارۋلانىپ كەلىپ، قاتارلاستارىنا شابۋىلداعان جاس ءوسپىرىم، كەيىن بەلگىلى بولعانداي، پسيحياتريالىق ەسەپتە تۇرعان.
زارداپ شەككەن بالالاردىڭ ەكەۋىنە وتا جاسالىپ، ولار جانساقتاۋ بولىمىنە جاتقىزىلدى. ءۇشىنشىسى قاجەتتى كومەك العاننان كەيىن ۇيىنە جىبەرىلدى.
س ق و اكىمى وقيعانى باقىلاۋدا ۇستاپ وتىر. ايداربەك ساپاروۆ ءىستىڭ ءمان-جايىن تولىق انىقتاۋ ءۇشىن ارنايى كوميسسيا قۇرىلعانىن ايتتى.
فوتو: facebook.com/people/ايداربەك- ساپاروۆ
