تۇركىستاندا تاۋ پىستەسى وسىرىلەتىن بولادى

تۇركىستان. قازاقپارات - تۇركىستاندا تاۋ پىستەسى - «فيستاشكي» وسىرىلەتىن بولادى، دەپ حابارلايدى قازاقپارات ءتىلشىسى.

تۇركىستاندا تابيعاتتىڭ توسىن قۇبىلىستارىنا بوي بەرمەيتىن، ادام مەن اڭ- قۇسقا كولەڭكەسىمەن سايا بولاتىن جاڭا اعاش- بۇتا تۇرلەرىن جەرسىندىرۋ جۇمىستارى ءجۇرىپ جاتىر. سونىڭ ءبىرى - «فيستاشكي». مامانداردىڭ سوزىنشە، تەك جەرورتا تەڭىزى، سولتۇستىك- باتىس افريكا، شىعىس ازيا ەلدەرى مەن كاۆكاز تاۋلارىندا كەزدەسەتىن بۇل وسىمدىك الداعى جىلدارى تۇركىستاندا جەمىس بەرەتىن بولادى.

«تاۋپىستە تۇركىستان وبلىسىندا «سايرام - وگەم» مەملەكەتتىك ۇلتتىق تابيعي پاركىنىڭ تۇلكىباس فيليالى اۋماعىندا كوپ جىلدان بەرى ءوسىپ تۇر. 2021 -جىلدىڭ كۇز ايىندا 5 كەلى تاۋپىستە تۇقىمى جينالىپ، تاجىريبە رەتىندە ستراتيفيكاتسياعا قويىلعان بولاتىن. ەندى بۇرشىك جارا باستاعان تاۋپىستە ءدانىن 2022 -جىلدىڭ كوكتەمىندە «جاسىل ايماق» ك م م- ءنىڭ عىلىمي قىزمەتكەرلەرى «ەسكى اۋەجاي» ۋچاسكەسىنە ەگىپ كوردى. ناتيجەسى جامان ەمەس. ەگىلگەن تاۋپىستە ءدانىنىڭ ونىمدىلىگى 65 پايىزعا جەتتى. بۇل - ميكروكليماتى قۇرعاق تۇركىستان قالاسى ءۇشىن وتە جاقسى كورسەتكىش، - دەيدى «جاسىل ايماق» كوممۋنالدىق مەملەكەتتىك مەكەمەسىنىڭ اعا عىلىمي قىزمەتكەرى تولەبي مۇحتار ۇلى.