جوعارى سوت كەڭەسىنىڭ ءتوراعاسى پرەزيدەنتتىڭ كەلىسىمىنسىز قاماۋعا الىنبايدى - زاڭ جوباسى
بۇل تۋرالى پارلامەنتتىڭ قاراۋىنا ەنگىزىلگەن زاڭ جوباسىندا جازىلعان، دەپ حابارلايدى قازاقپارات ءتىلشىسى.
«قىلمىس ورنىندا ۇستاپ الىنعان نە اۋىر نەمەسە اسا اۋىر قىلمىستار جاساعان جاعدايلاردان باسقا كەزدە، كەڭەس ءتوراعاسىن ءوز وكىلەتتىگى مەرزىمى ىشىندە پرەزيدەنتتىڭ كەلىسىمىنسىز ۇستاپ الۋعا، كۇزەتپەن ۇستاۋعا، ءۇي قاماققا الۋعا، كۇشتەپ اكەلۋگە، سوت تارتىبىمەن قولدانىلاتىن اكىمشىلىك جازالاۋ شارالارىن قولدانۋعا، قىلمىستىق جاۋاپتىلىققا تارتۋعا بولمايدى.
سوتقا دەيىنگى تەرگەپ-تەكسەرۋ ق ر باس پروكۋرورىنىڭ كەلىسىمىمەن عانا جالعاستىرىلۋى مۇمكىن. كەڭەس ءتوراعاسى قىلمىس ۇستىندە ۇستاپ الىنعان نە اۋىر نەمەسە اسا اۋىر قىلمىس جاساۋعا دايىندالۋ نەمەسە وقتالۋ فاكتىسى انىقتالعان نە ول اۋىر نەمەسە اسا اۋىر قىلمىس جاساعان جاعدايلاردا، وعان قاتىستى سوتقا دەيىنگى تەرگەپ-تەكسەرۋ ق ر باس پروكۋرورىنىڭ كەلىسىمىن العانعا دەيىن، ءبىراق 1 تاۋلىك ىشىندە ونى مىندەتتى تۇردە حاباردار ەتە وتىرىپ، جالعاستىرىلۋى مۇمكىن. اتالعان ادامعا قاتىستى ارناۋلى جەدەل-ىزدەستىرۋ ءىس-شارالارى مەن جاسىرىن تەرگەۋ ارەكەتتەرى ق ر زاڭنامالىق اكتىلەرىندە كوزدەلگەن تارتىپپەن جۇرگىزىلۋى مۇمكىن»، - دەلىنگەن جاڭا رەداكسيادا.
قازىرگى رەتتەۋشى زاڭنامادا مۇنداي نورما جوق. قۇجاتقا قوسىمشا بەرىلگەن تۇسىندىرمەدە بۇل ۇسىنىس جوعارى سوت كەڭەسى ءتوراعاسىنىڭ مارتەبەسىن جوعارى سوت مۇشەلەرىمەن تەڭەستىرۋ ماقساتىندا ەنگىزىلىپ وتىرعانى كورسەتىلگەن.
«جوعارى سوت مۇشەلەرىنىڭ جارتىسى سۋديا بولىپ تابىلاتىندىقتان جانە ەشكىمنىڭ تيىسپەۋى كەپىلدىگىنىڭ بولۋىنا بايلانىستى تۇزەتۋدە جوعارى سوت كەڭەسى ءتوراعاسىنا وسىنداي ەشكىمنىڭ تيىسپەۋىن بەكىتۋ ۇسىنىلادى»، - دەپ تۇسىندىرمە بەرىلگەن وزگەرىسكە.
