يزرايل اۆياتسياسى گازاداعى حاماس كەشەنىنە سوققى بەردى

اممان. قازاقپارات - دەمالىس كۇندەرى پالەستينا انكلاۆىنان جاسالعان زىمىراندىق شابۋىلدارعا جاۋاپ رەتىندە يزرايل دۇيسەنبى كۇنى گازاعا اۋە شابۋىلدارىن باستادى، دەپ حابارلايدى قازاقپارات ءتىلشىسى يزرايل قورعانىس كۇشتەرىنە سىلتەمە جاساپ.

ءيزرايلدىڭ اۋە شابۋىلى سەنبى كۇنى گازا سەكتورىنان يزرايلدىك ەلدى مەكەندەرگە زىمىران ۇشىرۋىنا جاۋاپ بولدى.

«سەنبى كۇنى گازا سەكتورىنان يزرايلگە زىمىران ۇشىرۋعا جاۋاپ رەتىندە ساحال جويعىش ۇشاقتارى حاماس لاڭكەستىك ۇيىمىنا تيەسىلى زىمىراندار جاساۋ ءۇشىن پايدالانىلاتىن شيكىزاتى بار جەراستى نىسانىنا تۇندە شابۋىل جاسادى»، - دەلىنگەن يزرايل قورعانىس كۇشتەرىنىڭ مالىمدەمەسىندە.

يزرايل اسكەريلەرىنىڭ حابارلاۋىنشا، گازا شەكاراسىنا جاقىن ەلدى مەكەندەرگە جاسالعان اۋە سوققىلارىنان كەيىن اۋە شابۋىلىنىڭ سيرەنالارى ەستىلگەن. سونداي- اق يزرايل اسكەريلەرى بارلىق جاۋاپكەرشىلىكتى پالەستينالىق حاماس توبىنا جۇكتەدى.

«ساحال حاماس- تى گازادان شىققان بارلىق لاڭكەستىك ارەكەتتەرگە جاۋاپتى دەپ سانايدى جانە ول يزرايلگە قارسى قاۋىپسىزدىكتى بۇزۋدىڭ سالدارىمەن بەتپە- بەت كەلەدى»، - دەدى يزرايلدىك اسكەريلەر.

بۇدان باسقا، پالەستينالىق WAFA اقپارات اگەنتتىگىنىڭ حابارلاۋىنشا، يزرايل ارتيللەرياسى گازا سەكتورىنىڭ سولتۇستىگىندەگى بەيت- حانۋن قالاسىنىڭ باتىسىنداعى ءبىر نىسانعا جانە اۋىلشارۋاشىلىق القاپتارىنا ءۇش رەت وق جاۋدىرىپ، ايتارلىقتاي شىعىن كەلتىرگەن. سونىمەن بىرگە پالەستينانىڭ قىزىل جارتى جارتى اي ۇيىمى يزرايل ارمياسىنىڭ تاڭ اتار الدىندا يوردان وزەنىنىڭ باتىس جاعالاۋىنداعى نابلۋستا جاساعان شابۋىلىندا ءبىر ادامنىڭ قازا تاۋىپ، جەتى ادامنىڭ جارالانعانىن حابارلادى.

يزرايل قورعانىس كۇشتەرى نابلۋس رەيدىنە قاتىستى ازىرگە تۇسىنىكتەمە بەرگەن جوق.

بۇگىندە پالەستينا- يزرايل قاقتىعىسى تاعى دا شيەلەنىسىپ جاتىر. قاقتىعىس سالدارىنان جىل باسىنان بەرى 47 پالەستينالىق، ونىڭ ىشىندە سودىرلار مەن بەيبىت تۇرعىن قازا تاپتى، دەپ حابارلايدى AFP.

ارسەن وتەشيەۆ

فوتو: Mahmud Hams/AFP