پەتروپاۆلداعى وقيعادان كەيىن ەلىمىزدىڭ بارلىق مەكتەپتەرىنىڭ قاۋىپسىزدىك جۇيەسى تەكسەرىلەدى

استانا. قازاقپارات – ق ر وقۋ-اعارتۋ ءمينيسترىنىڭ تاپسىرماسى بويىنشا پەتروپاۆل قالاسىنداعى مەكتەپتە بولعان وقيعاعا قاتىستى كوميسسيا قۇرىلدى، دەپ حابارلايدى قازاقپارات مينيسترلىكتىڭ باسپا ءسوز قىزمەتىنە سىلتەمە جاساپ.

باسپا ءسوز قىزمەتىنىڭ حابارلاۋىنشا، كوميسسيا قۇرامىندا بالالاردىڭ قۇقىقتارىن قورعاۋ كوميتەتى، ءبىلىم سالاسىندا ساپانى قامتاماسىز ەتۋ دەپارتامەنتى، سولتۇستىك قازاقستان وبلىسى ءبىلىم باسقارماسىنىڭ وكىلدەرى بار.

ايتا كەتەيىك، مەكتەپتە قاۋىپسىزدىكتى قامتاماسىز ەتۋ ءۇشىن ورناتىلعان بەينەباقىلاۋ كامەرالارى مەن دابىل تۇيمەسى جۇمىس ىستەيدى. قازىرگى ۋاقىتتا وقيعانىڭ ءمان-جايى انىقتالىپ جاتىر.

سونىمەن قاتار، وبلىستىق، رەسپۋبليكالىق ماڭىزى بار قالالاردىڭ ءبىلىم باسقارمالارىنا ەلىمىزدىڭ بارلىق جالپى ءبىلىم بەرەتىن مەكتەپتەرىندە قاۋىپسىزدىكتى تەكسەرۋ جۇمىسى تاپسىرىلدى.

ەستەرىڭىزگە سالا كەتسەك، 2022 -جىلدىڭ 30-ناۋرىزىندا ءبىلىم بەرۋ ۇيىمدارىندا قاۋىپسىزدىكتى قامتاماسىز ەتۋ ءۇشىن مينيسترلىك ءبىلىم جانە عىلىم سالاسىنداعى قىزمەتتى جۇزەگە اسىراتىن تەرروريستىك تۇرعىدان وسال وبەكتىلەردى تەرروريزمگە قارسى قورعاۋدى ۇيىمداستىرۋ جونىندەگى نۇسقاۋلىقتى بەكىتتى.

وسىعان دەيىن پەتروپاۆلدا 9-سىنىپ وقۋشىسى مەكتەپكە قارۋلانىپ كەلىپ، بىرنەشە بالانى جاراقاتتاعانى حابارلاندى.

سونداي-اق بالالاردى جاراقاتتاعان وقۋشى پسيحياتريالىق ەسەپتە تۇراتىنى حابارلاندى.