كانادا اسپانىنان بەلگىسىز وبەكت اتىپ ءتۇسىرىلدى
ازىرگە ولاردىڭ كىمگە تيەسىلى ەكەنى بەلگىسىز. دەگەنمەن، اپپارات سىنىقتارى جينالىپ، زەردەلەنىپ جاتىر. ال ا ق ش پرەزيدەنتى دجو بايدەن مەن كانادا پرەمەرى دجاستين تريۋدو اۋە كەڭىستىگىن بىرلەسىپ قورعاۋ ءۇشىن تىعىز بايلانىستا بولۋعا كەلىستى.
سەنبىدە ا ق ش- تىڭ F-22 جويعىش ۇشاعى كانادانىڭ اۋە كەڭىستىگىندەگى بەلگىسىز سيليندر تارىزدەس اپپاراتتى اتىپ ءتۇسىردى. كانادا پرەمەر-ءمينيسترى دجاستين تريۋدو ەل اۋماعىنىڭ سولتۇستىگىنە قۇلاعان نىساندى راستاپ، قازىر اسكەريلەر ونىڭ قايدان كەلگەنىن، قانداي ماقساتتا ۇشىپ جۇرگەنىن ءبىلۋ ءۇشىن قالدىقتارىن جيىستىرىپ جاتقانىن مالىمدەدى. بەلگىلىسى، ازىرگە بەيمالىم ۇشۋ اپپاراتى ازاماتتىق اۋە قوزعالىسىنا قاۋىپ توندىرگەن. دەمەك، جولاۋشىلار ۇشاعىنىڭ بيىكتىگىندە قالىقتاپ جۇرگەن.
دجاستين تريۋدو، كانادا پرەمەر- ءمينيسترى:
- بىرىنشىدەن، كانادالىقتاردىڭ قاۋىپسىزدىگى ءبىزدىڭ باستى مىندەتىمىز. سوندىقتان مەن ازاماتتىق اۆياتسياعا قاۋىپ توندىرەتىن جانە كانادالىقتار ءۇشىن قانداي دا ءبىر قاۋپى بار نىساندى اتىپ ءتۇسىرۋ تۋرالى شەشىم قابىلدادىم. ءبىز ءالى دە كوپ نارسەنى ءبىلۋىمىز كەرەك. سول ءۇشىن بۇل نىساندى تالداۋ وتە ماڭىزدى.
ال كانادانىڭ قورعانىس ءمينيسترى انيتا اناند ازاماتتىق اۋە قوزعالىسىنا قاۋىپ توندىرگەن نىسان قاي ەلگە تيەسىلى بولۋى مۇمكىن دەگەن بولجام جاساۋدان باس تارتتى. پەنتاگون مالىمدەمەسى بويىنشا بايدەن مەن تريۋدو ءوزارا سويلەسكەن سوڭ، ا ق ش پەن كانادانىڭ اسكەريلەرى بىرلەسىپ جۇمىس ىستەپ جاتىر. جالپى F-22 جويعىش ۇشاعى وسىمەن ا ق ش پەن كانادا اسپانىندا قالىقتاعان 4-نىساندى اتىپ ءتۇسىردى. بۇل بۇرىن سوڭعى بولماعان وقيعا. كىم، نە ءۇشىن جىبەرىپ وتىر دەگەن سۇراققا ناقتى جاۋاپ جوق. ونىڭ كىمگە تيەسەلى ەكەنى ايتىلماسا دا، العاشقىسى قىتايدىڭ اپپاراتى دەپ، ۇلكەن مىنبەردەن، ءىرى مالىمدەمە جاسالعان بولاتىن.
نۇربەك بەكەن
www.24.kz
