ورتالىق ازيا مەملەكەتتەرى پارلامەنتارالىق فورۋمىنىڭ تۇركىستان دەكلاراتسياسى قابىلداندى

تۇركىستان. قازاقپارات - تۇركىستان قالاسىندا وتكەن ورتالىق ازيا مەملەكەتتەرى پارلامەنتارالىق فورۋمىنىڭ قاتىسۋشىلارى تۇركىستان دەكلاراتسياسىن قابىلدادى.

قازاقپارات ق ر پارلامەنتى سەناتىنىڭ تەلەگرام كانالىنا سىلتەمە جاساي وتىرىپ، دەكلاراتسيانىڭ تولىق ءماتىنىن ۇسىنادى.

ءبىز، 2023-جىلعى 9-10- اقپاندا تۇركىستان قالاسىندا وتكەن ورتالىق ازيا مەملەكەتتەرىنىڭ ءبىرىنشى پارلامەنتارالىق فورۋمىنىڭ قاتىسۋشىلارى،

قازاقستان رەسپۋبليكاسى، قىرعىز رەسپۋبليكاسى، تاجىكستان رەسپۋبليكاسى، تۇرىكمەنستان جانە وزبەكستان رەسپۋبليكاسى پارلامەنتتەرىنىڭ اتىنان وكىلدىك ەتە وتىرىپ،

تاتۋ كورشىلىك پەن ءوزارا سىيلاستىق قاعيداتتارىنا نەگىزدەلگەن عاسىرلار بويعى تاريحي، رۋحاني جانە مادەني تۇتاستىق پەن ورتالىق ازيا حالىقتارىنىڭ دوستىعىنا سۇيەنە وتىرىپ،

تاريحي قالىپتاسقان مىقتى كورشىلىك قاتىناستار نەگىزىندە وڭىرلىك ىنتىماقتاستىقتى دامىتۋدىڭ ۇدەمەلى پروتسەسىن راستاي وتىرىپ،

ورتالىق ازيا مەملەكەتتەرى باسشىلارىنىڭ ءوزارا ءتيىمدى وڭىرلىك ىنتىماقتاستىقتى نىعايتۋ جونىندەگى كۇش-جىگەرىن جوعارى باعالاي وتىرىپ،

2022-جىلعى 21- شىلدەدە شولپان-اتا قالاسىندا وتكەن ورتالىق ازيا مەملەكەتتەرى باسشىلارىنىڭ كونسۋلتاتيۆتىك كەزدەسۋىنىڭ ءمانىن، سونداي-اق پارلامەنتارالىق فورۋم وتكىزۋ تۋرالى قول جەتكىزىلگەن ۋاعدالاستىقتى ءىس جۇزىندە ىسكە اسىرۋدىڭ ماڭىزدىلىعىن اتاپ كورسەتە وتىرىپ،

2023-جىلعى 14-15- قىركۇيەكتە دۋشانبە قالاسىندا ورتالىق ازيا مەملەكەتتەرى باسشىلارىنىڭ بەسىنشى مەرەيتويلىق كونسۋلتاتيۆتىك كەزدەسۋىن وتكىزۋدى قۇپتاي وتىرىپ،

پارلامەنتتىك ديپلوماتيا بەيبىتشىلىكتى، ءوزارا تۇسىنىستىكتى جانە ءوزارا ءتيىمدى ىنتىماقتاستىقتى نىعايتۋدىڭ ماڭىزدى قۇرالى بولىپ تابىلاتىنى تۋرالى پىكىرلەردىڭ بىرلىگىن راستاي وتىرىپ،

پارلامەنتتىك ىنتىماقتاستىق ورتالىق ازيا مەملەكەتتەرىنىڭ ومىرلىك ماڭىزى بار جانە ۇزاق مەرزىمدى ۇلتتىق مۇددەلەرىنە ساي كەلەتىنىنە سەنىم بىلدىرە وتىرىپ،

وڭىردەگى، سونداي-اق الەمدەگى وتكىر سىن-قاتەرلەردى شەشۋدە پارلامەنتارالىق بايلانىستار ءرولىنىڭ ارتىپ كەلە جاتقانىنا ءمان بەرە وتىرىپ،

پارلامەنتتەردىڭ بەيبىتشىلىكتى، تۇراقتىلىق پەن قاۋىپسىزدىكتى قامتاماسىز ەتۋ مۇددەسىندە اشىق جانە اۋقىمدى ءوزارا ءىس-قيمىلعا دايىندىعىن راستاي وتىرىپ،

2022-جىلعى جەلتوقساندا قابىلدانعان بۇۇ باس اسسامبلەياسىنىڭ 77-سەسسياسىنىڭ ورنىقتى دامۋ ماقساتتارىنا قول جەتكىزۋدى جەدەلدەتۋدەگى پارلامەنتتەردىڭ ءرولىن كۇشەيتۋ تۋرالى قارارىنىڭ ماڭىزدىلىعىن قۇپتاي وتىرىپ:

1. ورتالىق ازيا مەملەكەتتەرى اراسىنداعى جان-جاقتى ارىپتەستىكتى قولداۋ ءۇشىن پارلامەنتارالىق بايلانىستاردى ودان ءارى نىعايتۋدى قولدايمىز.

2. ورتالىق ازيا ءوڭىرىن دامىتۋ، وركەندەتۋ جانە ورنىقتى دامىتۋ ماقساتىندا ەكىجاقتى جانە كوپجاقتى ءىس-شارالار وتكىزۋ، پارلامەنتتىك دەلەگاتسيالاردىڭ ءوزارا ساپارلارىن جۇزەگە اسىرۋ ارقىلى پارلامەنتارالىق ىنتىماقتاستىقتى كەشەندى دامىتۋعا بەيىلدىلىكتى راستايمىز.

3. ورتالىق ازيا مەملەكەتتەرىنىڭ زاڭنامالارىن جەتىلدىرۋ پروتسەسىندە جالپى وڭىرلىك مۇددەلەردى ەسكەرە وتىرىپ، تىعىز ءوزارا ءىس-قيمىلدى جالعاستىرۋعا دايىن ەكەندىگىمىزدى بىلدىرەمىز.

4. پارلامەنتتەر اراسىنداعى دوستىق جانە ءوزارا ءتيىمدى بايلانىستاردى ودان ءارى نىعايتۋ ماقساتىندا زاڭ شىعارۋشى ورگانداردىڭ ىنتىماقتاستىق جونىندەگى پارلامەنتارالىق كوميسسيالارى، دوستىق توپتارى، بەيىندى كوميتەتتەرى اراسىنداعى ءوزارا ءىس-قيمىلدى كەڭەيتۋدىڭ ماڭىزدىلىعىن اتاپ وتەمىز.

5. پارلامەنتتەردىڭ ەكونوميكالىق، الەۋمەتتىك، سۋ-ەنەرگەتيكالىق، كولىكتىك، لوگيستيكالىق، تۋريستىك جانە مادەني-ىزگىلىك الەۋەتتەردى جان-جاقتى دامىتۋ، سونداي-اق ورتالىق ازيا ءوڭىرى مەملەكەتتەرى حالىقتارىنىڭ ءال-اۋقاتى مەن ءومىر ءسۇرۋ ساپاسىن ارتتىرۋ ءۇشىن قۇقىقتىق نەگىز قۇرۋداعى سىندارلى ءرولىن اتاپ كورسەتەمىز.

6. ءوڭىرارالىق، شەكارا ماڭىنداعى ىنتىماقتاستىقتى كەڭەيتۋ جانە ترانسشەكارالىق تۋريستىك مارشرۋتتاردى دامىتۋعا جاردەمدەسۋ ماقساتىندا ءوڭىر مەملەكەتتەرىنىڭ جەرگىلىكتى وكىلدى ورگاندارى اراسىندا تىعىز بايلانىستار ورناتۋدى جاقتايمىز.

7. پارلامەنتشىلەردىڭ تومەن كومىرتەكتى ەكونوميكانى قۇرۋعا، كليماتتىڭ وزگەرۋىمەن كۇرەسكە، قورشاعان ورتانى قورعاۋعا، سۋ-ەنەرگەتيكالىق رەسۋرستاردى ءتيىمدى پايدالانۋعا، ەنەرگەتيكالىق جانە ازىق-تۇلىكتىك قاۋىپسىزدىكتى قامتاماسىز ەتۋگە، سونداي-اق اتالعان سالالاردا حالىقارالىق جوبالار مەن باعدارلامالاردى ىلگەرىلەتۋگە قوسقان ۇلەسىن ارتتىرۋ قاجەتتىگىن اتاپ كورسەتەمىز.

8. پارلامەنتتەردىڭ حالىقارالىق تەرروريزمگە، ءدىني ەكسترەميزمگە، زاڭسىز كوشى-قونعا، ترانسشەكارالىق ۇيىمداسقان قىلمىسقا، ەسىرتكى قۇرالدارىنىڭ زاڭسىز اينالىمىنا جانە ەسىرتكى ترافيگىنە قارسى كۇرەستە ءوڭىر ەلدەرىنىڭ ودان ءارى ءوزارا ءىس-قيمىلى ءۇشىن قاجەتتى قۇقىقتىق جاعدايلار جاساۋعا ازىرلىگىن بىلدىرەمىز.

9. ب ۇ ۇ- نىڭ 2030-جىلعا دەيىنگى ورنىقتى دامۋ جونىندەگى كۇن ءتارتىبىن ىسكە اسىرۋ ماقساتىندا زاڭ شىعارۋشى ورگانداردىڭ كۇش-جىگەرىن ۇيلەستىرۋدىڭ ماڭىزدىلىعىن راستايمىز،

10. ءوڭىر مەملەكەتتەرىنىڭ ءبىلىم بەرۋ جانە دەنساۋلىق ساقتاۋ سالالارىنداعى بىرلەسكەن باستامالاردى قولداۋعا باعىتتالعان پارلامەنتارالىق بايلانىستارىن ودان ءارى كەڭەيتۋدى قولدايمىز.

11. ورتالىق ازيا مەملەكەتتەرى ايەلدەرىنىڭ قوعامدىق، الەۋمەتتىك-ەكونوميكالىق مارتەبەسى مەن جاعدايىن جاقسارتۋعا باعىتتالعان زاڭنامانى جەتىلدىرۋ جونىندەگى ءوزارا ءىس-قيمىلدى جالعاستىرۋدىڭ، تاجىريبە الماسۋدىڭ جانە بىرلەسكەن كۇش-جىگەردى ۇيلەستىرۋدىڭ ماڭىزدىلىعىن اتاپ كورسەتەمىز.

12. ورتالىق ازياداعى باۋىرلاس حالىقتاردىڭ ورتاق مادەني مۇرالارى مەن رۋحاني قۇندىلىقتارى نەگىزىندە مادەني-گۋمانيتارلىق ىنتىماقتاستىقتى تەرەڭدەتۋدەگى پارلامەنتتىڭ ءرولىن اتاپ كورسەتەمىز.

13. تۇركىستان قالاسىندا پارلامەنتشىلەردىڭ كوپجاقتى تىكەلەي ديالوگىن دامىتۋعا جانە پارلامەنتارالىق ىنتىماقتاستىقتى ودان ءارى تەرەڭدەتۋگە ىقپال ەتكەن ورتالىق ازيا مەملەكەتتەرىنىڭ ءبىرىنشى پارلامەنتارالىق فورۋمىن ۇيىمداستىرعانى ءۇشىن قازاقستان رەسپۋبليكاسى پارلامەنتىنىڭ سەناتىنا العىس بىلدىرەمىز.

14. كوپجاقتى پارلامەنتارالىق ديالوگتىڭ قاجەتتىلىگىن راستاعان جانە بولاشاقتا وسى فورماتتا تۇراقتى كەزدەسۋلەر وتكىزۋگە نەگىز بولعان ورتالىق ازيا مەملەكەتتەرىنىڭ ءبىرىنشى پارلامەنتارالىق فورۋمىنىڭ قورىتىندىلارىنا قاناعاتتانۋشىلىق تانىتامىز جانە ونىڭ ماڭىزدىلىعىن اتاپ كورسەتەمىز.

تۇركىستان قالاسى، قازاقستان رەسپۋبليكاسى

2023-جىلعى 10- اقپان