سەنات سپيكەرى ورتالىق ازيا ەلدەرىنىڭ پارلامەنتارالىق فورۋمىندا ارال ماسەلەسىن كوتەردى

تۇركىستان. قازاقپارات - ورتالىق ازيا ەلدەرىنىڭ پارلامەنتارالىق فورۋمى رەفورمالاردى زاڭنامالىق قامتۋ تاجىريبەسىمەن الماسۋ الاڭى بولا الادى.

بۇل پىكىردى ق ر پارلامەنتى سەناتىنىڭ ءتوراعاسى ماۋلەن اشىمبايەۆ ءبىلدىردى، دەپ حابارلايدى قازاقپارات ءتىلشىسى.

«پارلامەنتارالىق فورۋم رەفورمالاردى زاڭنامالىق قامتۋ تاجىريبەسىمەن الماسۋ الاڭى بولا الادى. قازاقستاندىق تاراپ سالىق زاڭناماسىن رەفورمالاۋ جونىندەگى جۇمىستار بويىنشا تاجىريبە الماسۋعا دايىن. قازىر بىزدە ۇلتتىق تابىستى بارىنشا ءادىل ءبولۋدى قامتاماسىز ەتۋ باعىتىندا ۇلكەن جۇمىس اتقارىلۋدا. ءبىز جاڭا قوعامدىق كەلىسىمنىڭ نەگىزىن قالايتىن الەۋمەتتىك كودەكستى دايىنداۋ تاجىريبەسىن دە بولىسۋگە دايىنبىز. ارىپتەستەرىمىز دە زاڭ شىعارۋ جانە جۇيەلى قايتا قۇرۋ تاجىريبەسىن ورتاعا سالۋعا دايىن ەكەنىنە سەنىمدىمىن»، - دەدى ماۋلەن اشىمبايەۆ.

سەنات سپيكەرى ءوڭىردىڭ وزەكتى ماسەلەلەرىن - ترانسشەكارالىق وزەندەردى بىرلەسىپ پايدالانۋ، ەكولوگيالىق جانە ەنەرگەتيكالىق تۇراقتىلىقتى قامتاماسىز ەتۋ، وزگە دە ماسەلەلەردى شەشۋ ءۇشىن فورۋم الەۋەتىن پايدالانۋ ماڭىزدى ەكەنىن ايتتى.

«پارلامەنتتىڭ كۇش-جىگەرىن ورتالىق ازيا ءوڭىرى ءۇشىن ورتاق سۋ پروبلەماسىنا جۇمىلدىرۋعا بولادى. سوڭعى جىلدارى ارال ماسەلەلەرى، ونىڭ كەبۋ سالدارىن ازايتۋ جانە تەڭىزدىڭ قالعان بولىگىنىڭ تايازداۋىنا جول بەرمەۋ بويىنشا وزبەك ارىپتەستەرىمەن بەلسەندى جۇمىس ىستەپ جاتىرمىز. ارال تەڭىزىنىڭ اپاتى قازاقستان مەن وزبەكستان عانا ەمەس، ورتالىق ازيانىڭ بارلىق ەلىنە زالال كەلتىرەدى»، - دەدى پالاتا ءتوراعاسى.

ماۋلەن اشىمبايەۆ باسقا ەلدەردىڭ پارلامەنتشىلەرىن بىرلەسكەن جۇمىسقا قوسىلۋعا شاقىردى.

«مۇزدىقتاردىڭ ەرۋى، ايماقتىڭ نەگىزگى سۋ ارتەريالارى اعىنىنىڭ ازايۋى دا وزەكتى بولىپ وتىر. بۇل ءبىزدىڭ ەلدەرىمىزدىڭ ازىق-تۇلىك قاۋىپسىزدىگىنە، ەنەرگەتيكالىق جانە ەكولوگيالىق تۇراقتىلىعىنا ەلەۋلى قاۋىپ توندىرەدى. بۇل ماسەلەلەردى سوڭعى جىلدارى تاجىك ارىپتەستەرىمىز بەلسەندى كوتەرىپ كەلەدى. پارلامەنتشىلەر وسى وزەكتى ماسەلەلەر مەن سىن-قاتەرلەردى جەڭىلدەتۋگە ءوز ۇلەسىن قوسا الار ەدى»، - دەدى ماۋلەن اشىمبايەۆ.

بۇعان دەيىن حابارلانعانداي، تۇركىستاندا ورتالىق ازيا مەملەكەتتەرىنىڭ ءبىرىنشى پارلامەنتارالىق فورۋمى ءوتتى.

قازاقستان پرەزيدەنتى قاسىم-جومارت توقايەۆ ورتالىق ازيا مەملەكەتتەرىنىڭ پارلامەنتارالىق فورۋمىنا قاتىسۋشىلارعا قۇتتىقتاۋ حات جولدادى.