ماۋلەن اشىمبايەۆ ورتالىق ازيا ەلدەرىنىڭ پارلامەنتارالىق فورۋمىن جىل سايىن وتكىزۋدى ۇسىندى

تۇركىستان. قازاقپارات – ق ر پارلامەنتى سەناتىنىڭ ءتوراعاسى ماۋلەن اشىمبايەۆ ورتالىق ازيا ەلدەرىنىڭ بىرىندە جىل سايىن پارلامەنتارالىق فورۋم وتكىزۋدى ۇسىندى، دەپ حابارلايدى قازاقپارات ءتىلشىسى.

«پارلامەنتارالىق فورۋم پارلامەنتارييلەردىڭ جۇيەلى جۇمىسى ءۇشىن ءتيىمدى جانە ناتيجەلى الاڭ بولا الارىنا سەنىمدىمىن. باستاما ءبىر رەتتىك شارا بولمايدى دەپ ۇمىتتەنەمىز. جىل سايىن ورتالىق ازيا ەلدەرىنىڭ بىرىندە پارلامەنتارالىق فورۋم وتكىزۋدى ۇسىنامىز. ونىڭ ەل استانالارىندا عانا ەمەس، حالىقتارىمىز ءۇشىن قاسيەتتى جانە مادەني-تاريحي ماڭىزى بار باسقا قالالاردا دا وتكەنى ماڭىزدى»، - دەدى ماۋلەن اشىمبايەۆ ورتالىق ازيا مەملەكەتتەرىنىڭ ءبىرىنشى پارلامەنتارالىق فورۋمىندا.

«وسىعان بايلانىستى وزبەك تاراپىنا جانە وزبەكستان وليي ءماجىلىسى سەناتىنىڭ ءتوراعاسى تانزيلا كامال قىزى ناربايەۆاعا كەلەسى جىلى سامارقاندتا ەكىنشى فورۋم وتكىزۋگە دايىن بولعانى ءۇشىن شىن جۇرەكتەن العىس بىلدىرەمىن. بۇل باستامانى قولداعانىڭىز ءۇشىن كوپ راحمەت»، - دەدى سەنات ءتوراعاسى.

سونداي-اق ماۋلەن اشىمبايەۆ تۇركىستان دەكلاراتسياسى جوباسىندا كوپجاقتى ءوزارا ءىس-قيمىلدىڭ باسىم باعىتتارى باياندالعانىن ايتتى. بۇل قۇجات بۇگىن فورۋم قورىتىندىسى بويىنشا قابىلداندى.

سەنات سپيكەرىنىڭ ايتۋىنشا، ورتالىق ازيا حالىقتارىنىڭ مادەني-گۋمانيتارلىق ىنتىماقتاستىعى، ورتاق مادەني جانە رۋحاني مۇراسىن ساقتاۋ جانە ىلگەرىلەتۋ ماڭىزدى باسىمدىق بولىپ سانالادى.

«بيىلعى قاڭتار ايىندا بىشكەكتە قازاق جانە قىرعىز زيالىلارىنىڭ فورۋمى ءوتتى، وعان نۇرلانبەك تۇرعىنبەك ۇلى ەكەۋمىز قاتىستىق. بۇل شارا الەمدىك مادەنيەت پەن ادەبيەتكە باعا جەتپەس ۇلەس قوسقان، قىرعىز حالقىنىڭ ۇلى تۇلعاسى شىڭعىس ايتماتوۆتىڭ 95 جىلدىعىنا ارنالدى. ش. ايتماتوۆ كورنەكتى جازۋشى، قوعام قايراتكەرى جانە ديپلومات رەتىندە ورتالىق ازيا بىرلىگى يدەيالارىن ناسيحاتتادى. بۇگىن بىزدە ۇلى جازۋشىنىڭ يدەيالارىن جۇزەگە اسىرۋ ءۇشىن جاڭا مۇمكىندىكتەر پايدا بولدى. ءبىز حالىقتارىمىز اراسىنداعى مادەني جانە رۋحاني بايلانىستاردى نىعايتۋ ءۇشىن فورۋم اياسىندا وسىنداي زيالى قاۋىم كەزدەسۋلەرىن وتكىزۋدى تالقىلاي الامىز»، - دەيدى ماۋلەن اشىمبايەۆ.

بۇعان دەيىن حابارلانعانداي، تۇركىستاندا ورتالىق ازيا مەملەكەتتەرىنىڭ ءبىرىنشى پارلامەنتارالىق فورۋمى ءوتتى.

قازاقستان پرەزيدەنتى قاسىم-جومارت توقايەۆ ورتالىق ازيا مەملەكەتتەرىنىڭ پارلامەنتارالىق فورۋمىنا قاتىسۋشىلارعا قۇتتىقتاۋ حات جولدادى.