تۇركيا اسپانىنداعى ەرەكشە بۇلت جەر سىلكىنىسىنىڭ بەلگىسى بولعانى راس پا؟

استانا. قازاقپارات - الەۋمەتتىك جەلى قولدانۋشىلارى تۇركيادا كەيىنگى اپتادا اسپاندا پايدا بولعان ەرەكشە ءپىشىندى بۇلتتىڭ سۋرەتىن تاراتىپ جاتىر.

جازبا اۆتورىنىڭ پىكىرىنشە، بۇل 2023-جىلعى 6- اقپانداعى جەر سىلكىنىسىنىڭ حابارشىسى بولۋى مۇمكىن.

الايدا بۇل دالەلدەنبەگەن، - دەپ حابارلايدى Stopfake.kz.

باسىلىم مالىمەتىنشە، شىن مانىندە، سۋرەتتە كورسەتىلگەن بۇلت تۇركيادا 2023-جىلعى 19- قاڭتاردا بايقالعان.

بۇل - لينزا ءتارىزدى نەمەسە لەنتيكۋليارلىق بۇلت. ول اۋا تولقىندارىنىڭ قاتپارلارىندا پايدا بولدى. بۇلت تۇركيانىڭ بۇرسا قالاسىندا قالىپتاسقان، وندا اۋا تەمپەراتۋراسى ءبىر كۇن بۇرىن 26 گرادۋسقا دەيىن كوتەرىلگەن.

ادەتتە، مۇنداي بۇلتتار - جەر سىلكىنىسىنىڭ ەمەس، جاۋىن-شاشىن بولاتىنىنىڭ بەلگىسى. مىسالى، بۇعان دەيىن رەسەي مەن ا ق ش تۇرعىندارى لەنتيكۋليار بۇلتتار تۋرالى حابارلاعان، ءبىراق ودان كەيىن جەر سىلكىنىسى بولعان جوق.

سونىمەن قاتار، بۇعان دەيىن ەرەكشە بۇلتتى بۇرسا تۇرعىندارى بايقاعان. بۇقارالىق اقپارات قۇرالدارى مالىمەتىنشە، بۇل قالا ەلدىڭ جەر سىلكىنىسى بولماعان بولىگىندە ورنالاسقان.

دەمەك، 2023-جىلعى 19- قاڭتاردا لەنتيكۋليار بۇلتتىڭ پايدا بولۋى 5-6- اقپانعا قاراعان ءتۇنى باستالعان جەر سىلكىنىسىنە ەشقانداي قاتىسى جوق. بۇل - كەزدەيسوق بولعان جاعدايلار.