بيىل تەگىن ۇيىرمەلەرگە بولىنەتىن قارجى بىلتىرعىدان از بولمايدى - جەڭىس قاسىمبەك

استانا. قازاقپارات - استانا اكىمى جەڭىس قاسىمبەك تەگىن ۇيىرمەلەرگە بولىنەتىن اقشا بىلتىرعىدان از بولمايتىنىن ءمالىم ەتتى، دەپ حابارلايدى قازاقپارات ءتىلشىسى.

قالا باسشىسىنىڭ بايقوڭىر اۋدانى تۇرعىندارىمەن كەزدەسۋىندە تەگىن ۇيىرمە قىزمەتىن كورسەتۋشىلەر قاۋىمداستىعىنىڭ جەتەكشىسى قۋات ەرعاليەۆ تەندەر وتكىزەتىن پلاتفورمانى اۋىستىرۋ جۇمىستارى ۇيىرمەلەردىڭ ۋاقىتىندا ىسكە قوسىلۋىنا كەدەرگى كەلتىرىپ جاتقانىن ماسەلە ەتىپ كوتەردى.

«ءبىرىنشى قاڭتاردان باستاپ «ArtSport» رەفورماسىنىڭ بۇرىنعى قالپى كەلمەسكە كەتتى. بۇرىنعى مادەنيەت جانە سپورت ءمينيسترى داۋرەن ابايەۆتىڭ 15- قىركۇيەكتەگى 265№ بۇيرىعىمەن اكىمدىكتەرگە پلاتفورمانى تاڭداۋعا رۇقسات بەرىلگەن. بۇگىندە استانا بويىنشا بۇل تەندەر وتكەن جوق. تەك كەشە عانا مادەنيەت جانە سپورت باسقارماسى رەفورماعا قاتىسۋشىلاردىڭ ءبارىن جيناپ، «Damubala» پلتافورماسىمەن ءۇشجاقتى كەلىسىم جاساۋىمىز كەرەكتىگىن ايتتى. سوندا ءبارىمىز تۇگەلدەي جاڭا جۇيەگە كوشۋىمىز كەرەك بولىپ وتىر»، - دەگەن جوبا جەتەكشىسى ءبىر پلاتفورمادان ەكىنشىسىنە وتۋگە كەمىندە ەكى اي كەتەتىنىن ايتتى.

اكىم پلاتفورما اۋىستىرۋ جۇمىستارى كەدەرگىسىز اياقتالسا، قاجەتتى اقشا ءبولىنىپ دايىن تۇرعانىن ايتىپ، سەندىردى.

«مەن بۇل ماسەلە بويىنشا وسىنىڭ الدىنداعى پلاتفورمانىڭ وكىلدەرىمەن سويلەستىم. مينيسترلىكتىڭ شەشىمىن دە بىلەم. اقشا تۋرالى ايتساق، قازىر 4 ميلليارد تەڭگە بولىنەدى. جىل اياعىنا دەيىن بولىنەتىن سوما بىلتىرعىدان كەم بولمايدى. قالعان ماسەلەنىڭ ءبارىن كەڭىنەن پىسىقتاۋ ءۇشىن سىزدەرمەن جەكە كەزدەسۋ وتكىزەمىن. ماسەلەنى سول كەزدە ناقتى تالقىلايىق»، - دەدى جەڭىس قاسىمبەك.