قانت قىزىلشاسىنىڭ ساپاسىزدىعىنان زاۋىت شىعىنعا ۇشىرايدى - قاۋىمداستىق پرەزيدەنتى
بۇل تۋرالى و ك ق- دە وتكەن بريفينگىدە «قازاقستان قانت، تاماق جانە قايتا وڭدەۋ ونەركاسىبى قاۋىمداستىعى» زاڭدى تۇلعالار بىرلەستىگىنىڭ پرەزيدەنتى ايجان اباقان قىزى وسىلاي مالىمدەدى، دەپ حابارلايدى قازاقپارات ءتىلشىسى.
«وتكەن جىلى فەرمەرلەر ءوز ونىمدەرىن زاۋىتقا وتكىزگەننەن كەيىن ءۇشىنشى كۇنى اقشالارىن الدى. بىزدە فەرمەرلەرگە قاتىستى ماسەلە بار. ماسەلەن، بىلتىرعى قانت قىزىلشاسىنىڭ ساپاسى وتە ناشار بولدى. قىزىلشا شىرىگەن، قوقىس ارالاسقان. ودان قانت شىقپايدى»، - دەپ ءمالىم ەتتى ايجان اباقان قىزى.
ايتۋىنشا، زاۋىتقا تاس پەن وزگە دە بوگدە زاتتار ارالاسقان ءونىم تاپسىرىلادى.
«قازىر فەرمەرلەر قىزىلشانى كومباينمەن جينايدى. تەحنيكا قىزىلشامەن بىرگە تاستار مەن سۋارۋعا ارنالعان شلانگىلاردى دا جيناپ الادى. كەيىن ونى زاۋىتقا اكەلەدى. مۇنداي ونىممەن جۇمىس ىستەۋ ءقاۋىپتى. ويتكەنى، قانت قىزىلشاسىمەن بىرگە كەلگەن قوقىستار مەن شلانگىلار زاۋىتتىڭ وڭدەۋ جەلىسىنە تۇسەدى. تيىسىنشە، بارلىق قۇرىلعىلاردى زاقىمدايدى. ناتيجەسىندە زاۋىت بارلىق پروتسەستى توقتاتۋعا ءماجبۇر بولادى. بۇل شىعىن فەرمەرلەرگە ەمەس، زاۋىتقا اۋىرتپاشىلىق سالادى»، - دەپ اتاپ ءوتتى ول.
ەسكە سالا كەتەيىك، بۇعان دەيىن ايجان اباقان قىزى سۋ بولماسا، قانت قىزىلشاسى القابىن كەڭەيتۋدىڭ ماڭىزى جوق ەكەنىن ايتقان ەدى.
