قانتتىڭ باعاسى قانداي جاعدايدا ارزانداۋى مۇمكىن - زاۋىت باسشىسىنىڭ جاۋابى
بۇل تۋرالى و ك ق- دە وتكەن بريفينگىدە «اقسۋ قانت» ج ش س قۇرىلتايشىسى قايرات ورازبەكوۆ ايتتى، دەپ حابارلايدى قازاقپارات ءتىلشىسى.
«اقسۋ قانت» زاۋىتى - قازاقستانداعى مازۋتپەن جۇمىس ىستەيتىن جالعىز زاۋىت. قالعاندارىنىڭ بارلىعى گازبەن ىستەيدى. مازۋتتىڭ باعاسى ەكسپورتتىق شەكتەۋلەرگە بايلانىستى بىردە كوتەرىلەدى، بىردە تومەندەيدى. ال ءبىز، قانت شىعارۋ ءۇشىن ونى ساتىپ الامىز. دەگەنمەن، باعانىڭ تۇراقسىزدىعى قانتتىڭ قۇنىنا دا اسەر ەتەدى. ماسەلەن، قانتقا شەكتى باعا قويىلعان. بۇل ورايدا ءبىزدىڭ شىعىندارىمىز ارتىپ كەتەدى. وبلىس اكىمدىگىنەن «قازمۇنايگازعا» حات جازۋىن وتىندىك. ءبىزدى ارنايى كاسىپورىندار تىزىمىنە ەنگىزۋىن سۇرايمىز نەمەسە بولىنەتىن كۆوتا كولەمىن ۇلعايتسا دەيمىز. مازۋتتىڭ كۆوتاسىن 20 مىڭ تونناعا كوبەيتۋ ورىندى بولار ەدى. ول وتە كوپ ەمەس. تيىسىنشە، قانتتىڭ باعاسى %10 عا ارزاندايدى. ءبىز وسى ماسەلەنى جارتى جىلدان بەرى شەشە الماي كەلەمىز»، - دەپ ۇسىنىس ءبىلدىردى قايرات ورازبەكوۆ.
قوسا كەتسەك، بۇعان دەيىن «قازاقستان قانت، تاماق جانە قايتا وڭدەۋ ونەركاسىبى قاۋىمداستىعى» زاڭدى تۇلعالار بىرلەستىگىنىڭ پرەزيدەنتى ايجان اباقان قىزى سۋ بولماسا، قانت قىزىلشاسى القابىن كەڭەيتۋدىڭ ماڭىزى جوق ەكەنىن ايتىپ ەدى.
