قازاقستاننىڭ قانت يمپورتىنا تاۋەلدىلىگى وتە جوعارى – ا ش م
«قازاقستاننىڭ قانت يمپورتىنا تاۋەلدىلىگى وتە جوعارى. ءوزىمىزدىڭ وتاندىق ونىممەن نارىقتىڭ 40 پايىزىن عانا جاۋىپ وتىرمىز. ال ەگەر شيكىزاتتى الاتىن بولساق، وندا ىشكى نارىقتىڭ تەك 10 پايىزىن قانت قىزىلشاسىمەن قامتاماسىز ەتەمىز. دەمەك، ءبىزدىڭ نارىقتىڭ 60 پايىزى يپورتقا تاۋەلدى. ارينە، قانت قازاقستانعا رەسەي مەن بەارۋستان تاسىمالدانادى»، - دەدى قانات جاۋىمبايەۆ.
دەپارتامەنت ديرەكتورىنىڭ مالىمدەۋىنشە، بيىل قانت قىزىلشاسىن ەگۋگە ارنالعان القاپتاردىڭ كولەمى ۇلعايتىلعان.
«بيىل ۇكىمەت قانت ونەركاسىبىن دامىتۋ بويىنشا كەشەندى جوسپاردى قابىلدادى. ول 33 پۋنكتىدەن تۇرادى. ءبىراق، كەيبىر پۋنتىلەر بويىنشا ءالى دە تالقىلاۋدى قاجەت ەتەتىن ماسەلەلەر بار. دەسەك تە، كەشەندى جوسپاردى ورىنداۋ بويىنشا قازىرگى كەزدە ناتيجە جوق ەمەس. ونىڭ ءبىرى - ەگىس القاپتارىن ۇلعايتۋ. ماسەلەن، بيىل قانت قىزىلشاسىن ەگۋگە ارنالعان جەر كولەمى 10,1 مىڭ گەكتاردان 16,1 مىڭ گەكتارعا كەڭەيتىلدى»، - دەپ توقتالدى دەپارتامەنت ديرەكتورى.
قانات جاۋىمبايەۆتىڭ ايتۋىنشا، ەلگە يپورتتالاتىن قانتقا سالىناتىن قوسىمشا قۇن سالىعىنىڭ مولشەرى تومەندەتىلگەن. سونىمەن قاتار، اتالعان تاۋار ءتۇرىن وندىرەتىن زاۋىتتارعا بەرىلەتىن سۋبسيديا كولەمى ارتقان. ماسەلەن، بۇعان دەيىن قانتتىڭ 1 كيلوگرامىنا 15 تەڭگە سۋبسيديا تولەنەتىن بولسا، بيىلدان باستاپ 25 تەڭگە بولدى.
