ازىق-تۇلىكتى شەتەلدەن ءالى دە كوپ يمپورتتايمىز - ساراپشى

استانا. قازاقپارات - «اتامەكەن» ۇ ك پ ا و ك جانە تاماق ونەركاسىبى دەپارتامەنتىنىڭ ديرەكتورى ەربول ەسەنەيەۆ ازىق-تۇلىكتىڭ قىمباتتاۋىنا جول بەرمەۋ ماقساتىندا قانداي شارالار قابىلداۋ كەرەگىن ايتتى، دەپ حابارلايدى قازاقپارات ءتىلشىسى.

«ەلدە بەلگىلى ءبىر ديسبالانس بار. ءبىز ءالى كۇنگە دەيىن كوپتەگەن ازىق-تۇلىكتى يمپورتتاپ وتىرمىز. ارينە، يمپورت بولعاندىقتان، ءونىم ۆاليۋتاعا ساتىپ الىنادى، ول دوللار باعامىنا تىكەلەي بايلانىستى. ماسەلەن، تونناسى 200 مىڭ تەڭگە بولاتىن ونىمدەردى شامامەن 5 ميلليارد دوللارعا ەكسپورتتايمىز. بۇل رەتتە شەتەلدىك ءونىمدى تونناسىنا 300 مىڭ تەڭگەدەن يمپورتتايمىز. ياعني، يمپورت الماستىرۋ ماسەلەسىن شەشۋ كەرەك دەگەن سۇراق تۋىندايدى»، - دەدى ەربول ەسەنەيەۆ Jibek Joly تەلەارناسىنىڭ ەفيرىندە.

ونىڭ ايتۋىنشا، قازاقستانعا ارتىق ونىمدەر بويىنشا ءوندىرىستى ۇلعايتۋ قاجەت.

«شىن مانىندە، ءوز ءوندىرىسىمىزدى بىرنەشە ەسە ۇلعايتۋعا جانە ارتىق ازىق-تۇلىك وندىرىسىنە شوعىرلانۋعا بارلىق مۇمكىندىك بار. مىسالى، الما جەمىسىن الايىق. تۇتىنۋشى رەتىندە باعانىڭ قانداي كوررەلياتسياسى بولسا دا، الما ءىس جۇزىندە بىردەي باعادا قالادى. 10 جىل بۇرىن المانىڭ قۇنى 350 تەڭگە بولسا، قازىر تۇتىنۋشى ولاردى شامامەن 500 تەڭگە ساتىپ الۋدا. مۇنىڭ ءبارى ارتىق ءوندىرىستىڭ ارقاسى. ياعني، مەملەكەت جاعداي جاسادى. قازاقستاندا سوڭعى بەس جىلدا وتاندىق الما ءوندىرىسى %40 عا ءوستى. قازىر يمپورتقا تاۋەلدى ءونىم تۇرلەرى - قانت، ءسۇت ونىمدەرى قىمباتتاپ جاتىر»، - دەدى ە. ەسەنەيەۆ سۇحباتىندا.