الماتىدا ءۇي جانۋارلارىنا قاتىستى جاڭا ەرەجە كۇشىنە ەندى

الماتى. قازاقپارات - وڭتۇستىك استانادا بۇگىنەن باستاپ ءۇي جانۋارلارىن اۋلاۋ، ۋاقىتشا ۇستاۋ، جانسىزداندىرۋ جانە سەرۋەندەتۋدىڭ جاڭا ەرەجەلەرى كۇشىنە ەندى.

اتالعان ەرەجەنى وسى جىلدىڭ قاڭتار ايىندا الماتى قالاسىنىڭ ءماسليحاتى بەكىتكەن بولاتىن، دەپ حابارلايدى قازاقپارات ءتىلشىسى.

«جاڭا ەرەجەلەر جانۋارلارعا قاتىگەزدىك كورسەتۋدىڭ الدىن الۋعا، ولاردىڭ سانىن ادامگەرشىلىكپەن رەتتەۋگە، قالانىڭ ۆەتەرينارلىق- سانيتارلىق قاۋىپسىزدىگىن قامتاماسىز ەتۋگە، سونداي-اق ءۇي جانۋارلارىن ۇستاۋ جانە سەرۋەندەتۋ ءتارتىبىن رەتتەۋگە باعىتتالعان. وندا «اۋلاۋ- زارارسىزداندىرۋ- ۆاكتسيناتسيا- قايتارۋ» (ا ز ۆ ق) باعدارلاماسى ارقىلى ولاردىڭ سانىن گۋمانيستىك جولمەن رەتتەۋ، ۇستاۋ تارتىبىنە قويىلاتىن تالاپتار قاراستىرىلعان»، - دەدى الماتى قالالىق كاسىپكەرلىك جانە ينۆەستيتسيالار باسقارماسىنىڭ باسشىسى بەرىك سولتانبايەۆ.

سپيكەردىڭ سوزىنشە، 2022 -جىلدىڭ ناۋرىز ايىنا دەيىن ۇستالعان جانۋارلاردىڭ يەلەرى تابىلىپ، اسىراپ الۋ كەلىسىمدەرى بويىنشا ءۇشىنشى تۇلعالارعا بەرىلگەنگە دەيىن 3 كۇن ۇستالعانىن، ال سۇراۋى جوق جانۋارلار مەديكامەنتوزدى ۇيىقتاتۋعا ۇشىراعانىن ەسكە سالدى.

ەندى بەلگىلى ءبىر جاعدايلاردى قوسپاعاندا (ەگەر جانۋار ادامعا، جانۋارلارعا شابۋىل جاساسا نەمەسە ادام ءومىرى مەن دەنساۋلىعىنا قاۋىپ توندىرسە، ەمدەلمەيتىن اۋرۋمەن اۋىرسا، وندا ق ر زاڭناماسىندا تىيىم سالىنباعان پرەپاراتتارمەن، (ەۆتانازيا) جانسىزداندىرىلادى.

«وسىعان وراي، قالالىق ۆەتەرينارلىق قىزمەت بۇرالقى ءيت پەن مىسىقتى اۋلاۋ قىزمەتىن جاڭارتتى: ۋاقىتشا ۇستاۋ پۋنكتى حيرۋرگيالىق قۇرال- جابدىقتارمەن جانە ۆەتەرينارلىق پرەپاراتتارمەن جابدىقتالعان: ۇستاۋ- زارارسىزداندىرۋ- ۆاكسيناتسيا- بوساتۋ (ۇ ز ۆ ب) جانە وپەراتسيادان كەيىنگى كۇتىم. سونداي- اق 200 ورىندىق قورشاۋلارى بار مودۋلدىك بلوك ورناتىلدى»، - دەيدى سپيكەر.

ۋاقىتشا ۇستاۋ پۋنكتىندە جانۋارلاردى تىركەۋدەن، تەكسەرۋدەن، يەسىن انىقتاۋعا ارنالعان چيپتىڭ بار-جوعىن سكانەردەن وتكىزگەننەن كەيىن جانۋارلاردىڭ سۋرەتتەرى Instagram جەلىسىندەگى @aulau_kyzmeti رەسمي پاراقشاسىندا جاريالانادى.

سۇراۋى جوق جانۋارلار جۇقپالى اۋرۋلارعا دياگنوستيكالىق جانە اگرەسسيالىق سىناقتاردان كەيىن ۇ ز ۆ ب پروتسەدۋراسىنان ءوتىپ، بيركالار تاعىلىپ، بۇرىنعى مەكەندەۋ ورىندارىنا جىبەرىلەدى.

قالا تۇرعىندارى وسى جاسىل بيركالارعا قاراپ، جانۋاردىڭ اگرەسسيۆتى ەمەس جانە اينالاسىنداعىلارعا قاۋىپ توندىرمەيتىنىن تۇسىنەدى.

بەرىك سولتانبايەۆتىڭ ايتۋىنشا، بۇگىندە ۇستاۋ- زارارسىزداندىرۋ- ۆاكتسيناتسيا- بوساتۋ باعدارلاماسى ىسكە قوسىلعاننان كەيىن بۇرىنعى اۋلانعان جەرلەرگە ەرىكتىلەر مەن جانۋارلاردى قورعاۋ ۇيىمدارىنىڭ باقىلاۋىمەن 134 ءيت پەن 1 مىسىق شىعارىلدى.

«بيىل قاڭعىباس مىسىقتارعا ارنالعان ۇيلەر ورناتۋ بويىنشا پيلوتتىق جوبانى ىسكە قوسۋ جوسپارلانۋدا. بۇل جوبانىڭ ماقساتى قاجەتتى مالىمەتتەردى الۋ جانە ۇ ز ۆ ب باعدارلاماسىنان وتكەن قاڭعىباس يتتەر ءۇشىن پيتومنيكتەردى ورناتۋداعى ىقتيمال قيىندىقتاردى انىقتاۋ بولىپ تابىلادى. ءۇيسىز جانۋارلاردى قورعاۋ الەۋمەتتىك ماڭىزى بار ماسەلە ەكەنىن تۇسىنەمىز جانە بۇل ماسەلەنى شەشۋگە ءاربىر ادام قاتىسا الادى. قولعا العان جانۋارلار ءۇشىن ءبىز جاۋاپتىمىز»، - دەدى ب. سولتانبايەۆ.

الماتى قالاسىندا ءۇي جانۋارلارىن ۇستاۋ جانە سەرۋەندەتۋ ءتارتىبى ءۇي جانۋارلارىنىڭ يەلەرى مەن جاۋاپتى تۇلعالاردىڭ جاۋاپكەرشىلىگىن رەتتەيتىن جاڭا ەرەجەمەن ايقىندالادى.

جاڭا ەرەجەدە «جاۋاپتى ادام» - جانۋار يەسىنىڭ جازباشا نۇسقاۋى بويىنشا جانۋار يەسىنىڭ قۇقىقتارى مەن مىندەتتەرىن اتقاراتىن ادام سياقتى ۇعىم ەنگىزىلدى.

وسى ەرەجەدەگى جاڭاشىلدىق، ءۇي جانۋارلارىن قاراۋسىز قالدىرۋعا بولمايدى. مۇنداي جاعداي تۋىنداعان جاعدايدا ءۇي جانۋارىنىڭ يەسى نەمەسە جاۋاپتى ادام جانۋاردى ۋاقىتشا ۇستاۋعا ءۇي جانۋارلارىنا ارنالعان پاناحاناعا ورنالاستىرادى نەمەسە ءۇشىنشى تۇلعالارعا ۋاقىتشا ۇستاۋعا بەرەدى، نە جانۋاردى زوولوگيالىق قوناقۇيگە ورنالاستىرادى.

جاراقات پەن زيان كەلتىرمەۋ ءۇشىن ءيت يەلەرى جانۋارلارىن جاڭا ەرەجەنىڭ تالاپتارىنا سايكەس سەرۋەندەتۋلەرى كەرەك.

سونداي- اق، يتتەرمەن كۇزەتىلەتىن تەحنيكالىق قىزمەت كورسەتۋ ستانتسيالارى، اۆتوتۇراقتار، قويمالار سياقتى ءوندىرىس ورىندارى بار مەنشىك يەلەرى مەن جاۋاپتى تۇلعالار جانۋارلاردى تەك تۇنگى ۋاقىتتا جانە قورشالعان اۋماقتا بوس ۇستاۋعا مىندەتتى. كۇندىزگى ۋاقىتتا يتتەردى قورادا نەمەسە قارعىباۋمەن ۇستاۋى ءتيىس.

قازاقستان رەسپۋبليكاسىنىڭ جانۋارلارعا جاۋاپكەرشىلىكپەن قاراۋ سالاسىنداعى بەلگىلەنگەن زاڭناماسىن بۇزعانى ءۇشىن جاۋاپكەرشىلىك قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 407-2-بابىمەن رەتتەلەدى.

سونداي-اق بەلگىلى ءبىر قۇقىق بۇزۋشىلىق ءۇشىن اكىمشىلىك ايىپپۇلدار سالۋدى قاراستىرادى جانە ولاردىڭ مولشەرى دە قۇقىق بۇزۋشىلىقتىڭ اۋىرلىعىنا بايلانىستى (10 نان 40 ا ە ك- كە دەيىن). ءبىر سوزبەن ايتقاندا، 1 ا ە ك - 3450 تەڭگە.

جاڭا ەرەجەلەر مۇمكىندىگى شەكتەۋلى (كورۋ قابىلەتى ناشار) جانداردىڭ جولسەرىك يتتەردى ۇستاۋىن دا نازارعا العان، ولار ساۋدا ورىندارىندا، وندىرىستىك زالداردا جانە ءۇي- جايلاردا يەلەرىمەن جۇرۋلەرىنە كەدەرگى جوق.

«اكىمشىلىك ايىپپۇلدار بوس جۇرگەن يتتەر تىستەگەن ادامداردىڭ دەنساۋلىعىن وتەي المايتىنىن ءارقايسىمىز جاقسى تۇسىنەمىز. سوندىقتان، ءۇي جانۋارلارى بار قالا تۇرعىندارىنىڭ ەسىنە سالعىم كەلەدى - «سىزدەر ولار ءۇشىن جاۋاپتىسىزدار، سوندىقتان ءۇي جانۋارلارىڭىزدىڭ تاۋلىكتىڭ كەز كەلگەن ۋاقىتىندا باسقالار ءۇشىن قاۋىپسىز بولۋى ءۇشىن بارلىق قاجەتتى شارالاردى قابىلداۋىڭىز كەرەك» ، - دەپ تۇيىندەدى بەرىك سولتانبايەۆ.

ەسكە سالا كەتەيىك، 2021 -جىلعى 30-جەلتوقساندا مەملەكەت باسشىسى «جانۋارلارعا جاۋاپكەرشىلىكپەن قاراۋ تۋرالى» قازاقستان رەسپۋبليكاسىنىڭ زاڭىن قابىلداعان بولاتىن، ول جانۋارلاردى قورعاۋ، ولاردىڭ قاۋىپسىزدىگىن قامتاماسىز ەتۋ، جانۋارلارعا قاراۋدا ادامگەرشىلىكتى نىعايتۋ جانە جانۋارلارمەن قارىم-قاتىناس جاساۋ كەزىندە قوعامنىڭ ادامگەرشىلىك قاعيداتتارىن ساقتاۋ، سونداي-اق جانۋارلاردى ۇستاۋ كەزىندە جەكە جانە زاڭدى تۇلعالاردىڭ قۇقىقتارى مەن زاڭدى مۇددەلەرىن قورعاۋدى رەتتەيدى.