الماتىدا كولىك ۇرلاماق بولعانداردىڭ ءساتسىز ارەكەتى ۆيدەوعا ءتۇسىپ قالدى
وقيعا 4-اقپاندا تاڭەرتەڭ اقكەنت شاعىناۋدانىنداعى كوپقاباتتى ءۇيدىڭ جەراستى تۇراعىندا بولعان. بەلگىسىز بىرەۋلەر تۇرعىنداردىڭ ءبىرىنىڭ كولىگىن ۇرلاماق بولعان. ولاردىڭ بۇل ارەكەتى ۆيدەوعا ءتۇسىپ قالعان.
كادرلاردا ەر ادامنىڭ تاڭعى 6-لار شاماسىندا جەراستى اۆتوتۇراعىنا كىرىپ، Toyota Camry كولىگىن اينالىپ ءوتىپ بارا جاتقانىن كورۋگە بولادى. وسى كەزدە ونىڭ سىبايلاسى تۇراق ەسىگىن اشقانىن ايتادى. سودان كەيىن ۇرى Toyota Camry-گە جاقىنداپ، وعان ءمىنىپ، كولىكتى وتالدىرىپ، تۇراقتان شىقپاق بولادى. تۇراقتان شىعا بەرىستە كولىك توقتاپ قالدى.
ۆيدەودا سويلەپ تۇرعان ادام كولىك يەسى سول كەزدە كولىك دابىلىنىڭ باسقارۋ پۋلتىندەگى تۇيمەنى باسقانىن، سودان كەيىن كولىكتەگى ۇرلىققا قارسى جۇيە ىسكە قوسىلعانىن جانە ونىڭ بۇعاتتالعانىن ايتادى.
كولىك ۇرىلارى ءبىراز ۋاقىت كولىكتى جۇرگىزۋگە تىرىسادى. الايدا ولاردىڭ بۇل ارەكەتى ناتيجە بەرمەي، قىلمىسكەرلەر اسىعىس قاشىپ قۇتىلادى.
قالالىق پوليتسيا دەپارتامەنتى بۇل دەرەكتىڭ ورىن العانىن راستاپ، كۇدىكتىلەر ىزدەستىرىلىپ جاتقانىن ايتتى.
«4-اقپاندا اقكەنت ىقشاماۋدانىنداعى ۇيلەردىڭ بىرىندە كولىك ۇرلاۋ ارەكەتى ورىن الدى. تەرگەۋ امالدارىن الاتاۋ اۋدانىنىڭ پوليتسيا ءبولىمى جۇرگىزىپ جاتىر. بۇل قىلمىستى اشۋ ءۇشىن ارنايى جەدەل- تەرگەۋ توبى قۇرىلدى»، - دەدى الماتى قالالىق پوليتسيا دەپارتامەنتىنىڭ باسپا ءسوز قىزمەتى.
